Ætlar Óskar Bergsson Framsóknarflokki að ganga til liðs við Sjálfstæðisflokkinn í borgarstjórn Reykjavíkur og skera hann úr snörunni sem hann kom sér hjálparlaust í? Ég er ekki viss. Óskari liggur ekkert á og fyrir liggur samkomulag minnihlutans sem til varð þegar Davíð Oddsson, Vilhjálmur Þ. Vilhjálmsson og Kjartan Magnússon höfðu vélað Ólaf Friðrik Magnússon í meirihlutasamstarf og látið honum eftir borgarstjórastólinn. Í pólitík er enginn vandi að brjóta slíkt samkomulag. Stundum gera menn það grátklökkir í þágu málefnanna, reknir áfram af leiðurum flokksbundinna ritstjóra Sjálfstæðisflokksins.

Annar kostur væri að veita minnihlutastjórn Sjálfstæðisflokksins í borginni hlutleysi. Með einhverjum samningi. Það gæti Óskar gert en fengi varla viðlíka bitlinga og ef hann settist í meirihlutasamstarf. Reyndar gæti allur minnihlutinn veitt minnihlutastjórn Sjálfstæðisflokksins hlutleysi. Ekkert stendur í vegi fyrir því annað en að það væri hin endanlega niðurlæging borgarstjórnarflokks Sjálfstæðisflokksins.

Tæp tvö ár eru til næstu borgarstjórnarkosninga. Ætli Framsóknarflokkurinn græði á því að fara til samstarfs við Sjálfstæðisflokkinn? Kannski. Hann virðist ekki hafa neitt grætt á því að sitja í minnihluta með Samfylkingu og VG.

Staða Sjálfstæðisflokksins er vonlaus og sannast sagna ber hann mesta ábyrgð á því hvernig komið er í stjórn borgarinnar. Gísli Marteinn búinn að fá sig fullsaddann og á förum úr landi.

Verði til nýr meirihluti Framsóknarflokks og Sjálfstæðisflokks í dag verður það þriðji meirihutinn sem báðir flokkarnir mynda á yfirstandandi kjörtímabili í borginni.

Samanlagt fylgi þeirra í skoðanakönnunum er litlu meira en fylgi núverandi meirihluta.