Þorsteinn Pálsson spyr því Davíð Oddsson seðlabankastjóra eins og sannur diplómat hvort hann sé sammála sérfræðingunum. Hvort mat bankans fari saman við stefnu ríkisstjórnarinnar.

Hreinn Loftsson (áður náinn samstarfsmaður Davíðs en genginn úr flokknum) ritaði grein í DV fyrir hvítasunnuhelgina og staðsetti helstu vörðurnar á leið þjóðarinnar inn í nútímann síðustu tuttugu árin eða svo. Hreinn taldi heillaráð að láta þjóðina sjálfa ákvarða - svona neðan úr grasrótinni -  hvort hún vilji sækja um aðild að Evrópusambandinu. Þetta kæmi flokkunum vel sem væru í vandræðum með dragbítana og óttuðust klofning.

Viti menn. Nú kemur varaformaður Sjálfstæðisflokksins, Þorgerður Katrín Gunnarsdóttir, varlega fram á völlinn á Kópavogsfundi í dag og boðar þjóðaratkvæðagreiðslu um málið. Að vísu ekki fyrr en á næsta kjörtímabili. Að vísu ekki fyrr en flokkurinn er búinn að kynna landsmönnum kosti og galla aðildar í víðtækri fundaherferð.
Þetta þýðir á íslensku að meiningin sé að hafa lýðræðið í heiðri og kjósendum leyfist að ráða atkvæði sínu en að vísu ekki fyrr en flokkurinn er búinn að segja þeim hvað eigi að kjósa.

En þetta er samt skref og sennilega stærra en nokkurn grunar. Allir hugsandi menn vita að leið Íslendinga inn í Evrópusambandið liggur í gegn um Sjálfstæðisflokkinn.