Nú er Jónas Friðrik Jónsson forstjóri Fjármálaeftirlitsins vaknaður af þyrnirósarsvefni og segir þjóðinni að hann sé alltaf á vaktinni. Hafi ekki getað komið í veg fyrir að Icesave reikningar Lansbankans kölluðu hörmungar yfir þjóðina. Hann tali sjaldan við Björgvin G. enda megi ráðherrann vita hvernig ástandið sé.

Þeir í Seðlabankanum eru líka alltaf á vaktinni. Tóku samt ekki hundruð milljarða lán frá Morgan bankanum í mars / apríl sem stóð honum til boða. Kannski stóð aldrei til að vera íslenskum bönkum lánveitandi til þrautavara. Undirmálskreppa búin að grassera á Vesturlöndum í hálft ár eða meira á þessum tíma og farið að tregast um millibankalán.
"Þú mátt vita það Sigurður minn, að ef þú ætlar að vera með kjafthátt og krefjast þess að fá að reka Kaupþing í evrum er mér að mæta. Ég knéset ykkur með einu vinki," gæti Davíð Oddsson seðlabankastjóri hafa sagt við Sigurð Einarsson í partýinu í eftir aðalfund IMF í BNA í fyrra. Hann tók líka kast í annarri veislu miklu fyrr eins og Matthías ritstjóri segir frá í dagbókum sínum á www.matthias.is .

Það er gott að Davíð Oddsson og Jónas Friðrik Jónsson, Geir H. Haarde og Björgvin G. Sigurðsson standa vaktina fyrir fjöldann.

Því miður fyrir þá er bankakerfið hrunið - hafi það farið framhjá þeim.  Íbúðaverð fellur eins og steinn, fyrirtæki fara á hausinn, atvinnulausir verða 10 þúsund eftir nokkrar vikur, gjaldeyrismálin í ólestri fimm vikum eftir hrun bankanna og óvissa um erlendar lántökur til að koma á stöðugleika.

Munið töfraorð síðustu ára: STÖÐUGLEIKI !

Það vekur alveg sérstaka öryggiskennd borgaranna að Jónas Fr., Davíð, Geir og Björgvin skuli standa vaktina. Fjöldinn kemur saman á Austurvelli á laugardögum til þess að hylla þessa foringja sína. Aðdáun þeirra vex með viku hverri enda fjölgar alltaf á Austurvelli. Sýna þar húsbóndavaldi og föðurlegri umhyggju hollustu sína og undirgefni.

Þeir standa vaktina fyrir okkur.