Er það ekki dásamleg sú tilhugsun að innan tíðar verði ríkið farið að reka tvo fjölmiðla: Ríkisútvarpið ohf. og Morgunblaðið ohf.

Þá þarf Guðni Ágústsson ekki að taka kast eins og Davíð vinur hans Oddsson gerði hér forðum þegar hann vildi setja fjölmiðlalögin gegn Jóni Ásgeir 2004. Nei, Guðna verður strax að ósk sinni um þjóðnýtta fjölmiðla frekar en að hafa þá í vondum höndum eins manns.

Þannig er mál með vexti - eins og dv.is greinir frá - að ríkisbankinn Glitnir er viðskiptabanki Árvakurs sem gefur út Moggann. Ingibjörg og Geir og aðrir stjórnendur bankans hafa nú stórfelldar áhyggjur af vaxandi skuldum og hallarekstri Moggans, en hann skuldaði nýverið nærri fjóra milljarða króna.

Jón Ásgeir, aðaleigandi 365, ætlaði að redda Mogganum með því að leggja inn Fréttablaðið í Árvakur og eignast þar með akkúrat 36,5 prósenta hlut í útgáfunni. Smart.

Af þessu verður áreiðanlega ekki og því gerist nú ríkisbankinn Glitnir órólegur.

Stefnan er tekin: Ríkið eignast fjölmiðlana Guðni minn. Og svo útgerðirnar og þar með kvótann. Og síðan kúabúin og alla mjólkina. Þá verður nú gaman að vera formaður í stjórnmálaflokki og jafnvel ráðherra.

Ég hef aðeins vissar áhyggjur af einu. Hvað ef Ríkismogginn fer að heimta greiðslur úr ríkissjóði? Verður þá nefskatturinn tvöfaldaður? Eða verður RÚV að gera sér að góðu að fá bara helminginn af nefskattinum?