Nú er bara að leggja til við Karl Ágúst og aðra Spaugstofumenn að þeir sviðsetji Kastljósþátt þar sem Spaugstofan er leidd fyrir rannsóknarrétt Ólínu Þorvarðardóttur og annarra sem vita hvar draga ber línuna fyrir hina siðblindu.

Heimspekingurinn Slavoj Zizek frá Slóveníu, sem hélt fyrirlestur fyrir fullu húsi hér á landi um síðustu helgi, segir í ágætri grein að þeir sem töldu að farið hefði verið yfir eitthvert strik í Jyllandsposten með birtingu skopteikninga af Múhammeð - töldu sig smánaða og svívirta með öðrum orðum - hefðu átt að sækja mál sitt fyrir dómstólum; höfða meiðyrðamál á hendur ritstjórum eða ábyrgðarmönnum Jyllandsposten frekar en að krefjast þess að fá afsökunarbeiðni frá danska ríkinu. Zizek þótti sem sé að viðbrögð múslima við teikningunum frægu endurspegluðu algert skilningsleysi þeirra á grundvallarreglunni um óháð og sjálfstætt borgaralegt samfélag.

Tjáningarfrelsið er einn af hornsteinum þessa samfélags. Það verður ekki gefið upp á bátinn fyrir bókstafstrúarmönnum. Frjálslyndum Íslendingum kann að þykja húmorlaust ofstækið gegn Spaugstofumönnum minna svolítið á viðbrögð bókstafstrúaðra múslima gegn skopmyndunum frægu í Jyllandsposten. Þeir geta þá ásamt Zizek farið með upphafsorðin  í Second Coming eftir írska skáldið William Butler Yeats: "the best lack all conviction, while the worst are full of passionate intensity" (hina bestu skortir alla sannfæringu en hinir verstu eru bólgnir af ástríðufullum ákafa). Vonandi eru frjálslyndir menn ekki svo blóðlausir að gefast upp fyrir ofstækinu, hvað þá vitleysunni í "Náðhúsi" Reykjavíkur þar sem menn vilja vera í friði með allt niður um sig eins og Þráinn Bertelson orðar það svo ágætlega.