Lesendur sem geta tekið undir eftirfarandi kröfu bið ég að deila henni og dreifa, en fyrst og fremst að fylgja henni eftir í orði og verki.*


# Engar mikilvægar breytingar verði gerðar á frumvarpi að nýrri stjórnarskrá, áður en það verður borið undir þjóðina, nema í samráði við alla fulltrúa sem sæti áttu í Stjórnlagaráði.


Ný stjórnarskrá er grundvallarþáttur í endurreisn landsins. Með frumvarpi að nýrri stjórnarskrá er horft til framtíðar, en landsmenn þurfa mjög á því að halda. Texti frumvarpsins er fullur af fyrirheitum, en dregur þó skammt ef íbúar landsins sitja áfram uppi með lamandi tilfinningu um að þeir búi í samfélagi ofurseldu óréttlæti og spillingu. 

Ný stjórnarskrá og réttlæti, heiðarlegt uppgjör við hrunið, eru tvær hliðar á sama peningi. Frumvarp Stjórnlagaráðs að nýrri stjórnarskrá er dýrmætara en svo að það megi verða leiksoppur stjórnmálaflokka og stjórnmálamanna sem réttilega eru rúnir öllu trausti.

Enginn dregur í efa að formlega á Alþingi síðasta orðið um breytingar á stjórnarskrá. Samt sem áður þarf þingið að taka mið af ástandinu í landinu og samhengi hlutanna. 

Á Íslandi varð ekki aðeins fjármálahrun, heldur siðferðilegt og pólitískt hrun. Skýrsla rannsóknarnefndar Alþingis staðfesti verstu grunsemdir almennings um íslenska stjórnmálastétt, stjórnmálaflokka og stjórnsýslu, og óheilbrigt samkrull viðskiptalífs og stjórnmála. Alþingi verður að taka mið af því að alþingiskosningar hafa ekki farið fram eftir að hin hrikalega skýrsla rannsóknarnefndarinnar kom út. Líka ber þinginu að líta til þess annmarka, að sú ríkisstjórn sem situr í skjóli núverandi meiri hluta er skipuð ráðherrum úr vanhæfu ríkisstjórninni, hrunstjórninni sem almenningur rak af höndum sér í mestu mótmælum sem gengið hafa yfir landið. 

Þegar af þessum ástæðum er núverandi þing mjög vanbúið að fást við frumvarp Stjórnlagaráðs. Auk þess er stjórnarskránni ætlað að setja þingmönnum og stjórnmálaflokkum margvíslegar skorður sem ekki er eðlilegt að þeir hlutist sjálfir til um nema að formi til. Reynslan ætti líka að verða þingmönnum víti til varnaðar.

Alþingi býr, í stuttum máli, við fordæmalausa og rökstudda tortryggni sem óheillavænlegt væri að líta framhjá nú, þegar það hefur fengið frumvarp Stjórnlagaráðs til afgreiðslu.

Til er farsæl leið sem stendur meiri hluta Alþingis opin. Allir fulltrúar í Stjórnlagaráði hafa lýst yfir að þeir væru reiðubúnir að vinna sameiginlega úr athugasemdum þingsins við frumvarpið, ef einhverjar væru. Alþingi á að þiggja boðið og bera frumvarpið síðan undir atkvæði þjóðarinnar. 

Meiri hluti Alþingis ætti ekki að slá á útrétta hönd Stjórnlagaráðs og hunsa kjósendur. - Við viljum frumvarp Stjórnlagaráðs!

------------------------
*Aðrar kröfur í Yfirlýsingu um réttlæti og nýja stjórnarskrá er að finna hér >>