Nú liggur fyrir að Hreinn Loftsson vill selja DV. Það er mikil ábyrgð sem fylgir því að eiga og reka fjölmiðil, mest er ábyrgðin þó kannski þegar kemur að því að selja eina frjálsa fréttamiðilinn í landinu. Ef rétt er sem greint er frá í fréttum að til sé að verða breiður hópur fólks sem vil kaupa blaðið verður Hreinn að gefa fólki tíma til að afla fjár.
 
Eftir giftusaman rekstur blaðsins væri hræðilegt ef hann tapaði ærunni við að selja þekktum bröskurum eða fjárglæfrafólki sem hefur verið á framfæri þjóðarinnar í raun og sann. Það var ekki öll þjóðin sem fékk að selja í Glitni áður en bankinn var felldur og öllu bankakerfi landsins komið í þrot. Meira að segja sjálfum seðlabankanum.

Það er heldur ekki öll þjóðin sem fær niðurfelldar skuldir uppá milljarða hjá hinum þjóðnýttu bönkum og bankaleifum. Gjaldþrota leifar gömlu bankanna eru reyndar eitthvað það undarlegasta sem fær að grassera í samfélaginu þessi misserin.

Hins vegar fær öll þjóðin að borga, borga fyrir óreiðumenn af því að þrotinu var illa stýrt og hrægammar komast upp með það sem þeir vilja.

Hreinn Loftsson veit mæta vel hvernig þetta er allt í pottinn búið, auðvitað vil hann fá sem mest fyrir sinn snúð en stundum verður líka að viðra þröskulda siðferðis og það yrði honum til ævarandi gæfu ef hann sýndi það fordæmi að stunda viðskipti á siðferðislega velþenkjandi nótum.
Það getur hann með því að gefa þann tíma sem þarf til að hópur án fjárglæfrafólks geti tekið höndum saman og keypt blaðið.

Það yrði líka eitthvað svo sætt við það að spilltar skilanefndir eða undalega þenkjandi bankamenn hefðu ekkert með söluna að gera, það væri svo frjáls og falleg framtíðarsýn sem fælist í því.

Nú er valdataflið allt í kringum Valhöll, spillingin komin með varðstöðvar upp um mela og móa.

Hreinn ég veðja á þig.

Vil vekja athygli á að mér er ekki gjarnt að tapa veðmálum.