← VANTRAUST! ÚTRÁS ÚR ÚTLEGÐ! →

30. október 2008

EVRÓPA BÍÐUR!

Eiríkur Jónsson

Vandinn við Evrópuumræðuna er sá að almenningi finnst hún flókin. Og það er stjórnmálamönnum að kenna.

Fyrst voru það áhyggjur af fiskimiðunum. Eins og okkur geti ekki verið sama um hvort það eru Spánverjar, Potrúgalar eða Íslendingar sem veiða fiskinn. Ekkert eigum við í kvótanum. Fiskurinn er farinn.

Og svo var það fullveldið. Það skiptir litlu í gjaldþrota ríki.

Við komum frá Noregi fyrir rúmlega þúsund árum og höfum reynt allt. Örbirgð og allsnægtir. Með réttu ættum við að fara aftur heim. Við getum þetta ekki.

Nema með því að sameinast Evrópu fyrir fullt og fast.

Þeir sem þekkja til á meginlandinu vita vel hvaða kostur það er sem stendur upp úr þegar kemur að Evrópusambandinu. Ekki er það evran, sameiginlegir markaðir eða annað sem bunast út úr stjórnmálamönnum. Frekar hitt; samstilltar reglur um hvernig samskiptum stjórnavalda og almennings skuli háttað. Reglur sem segja klíkuskap og spillingu stríð á hendur sem svo vel þrífst í nálægð og fámenni. Það eitt réttlætir inngöngu okkar í samfélag Evrópuþjóðanna og myndi gjörbreyta daglegu lífi þjóðarinnar og sjálfsmynd okkar allra.

Í Evrópusambandinu hefði Davíð Oddsson aldrei getað orðið Seðlabankastjóri og forsætisráðherratíð hans hefði örugglega styst í annan endann. Einkavæðing bankanna hefði aldrei orðið með þeim hætti sem raun ber vitni. Og greiningardeildir bankanna hefðu verið þvingaðar til að réttnefna sig auglýsingastofur bankanna. Svo fátt sé nefnt sem máli skiptir.

Og það besta: Við hefðum aldrei farið á hausinn og einhverjir væru á leið í fangelsi með réttu.

Gerum lífið skemmtilegra – Ísland er í Evrópu!

(Leiðari Séð og Heyrt 30. okt)

ATHUGIÐ Ritstjórn DV áskilur sér rétt til að eyða ærumeiðandi ummælum.