Fótbolti, fótbolti alla helgina í íslenska Ríkissjónvarpinu. Stórlega skert frétta- og veðurfréttaþjónusta. Íþróttir samtímis á tveimur rásum í sjónvarpinu. Þetta ætti að varða við lög. Ekki varð séð að nein af þeim norrænu stöðvum sem hér eru aðgengilegar sýndi leik Írlands og Króatíu í beinni útsendingu. BBC sýndi hann ekki ,en hann var hinsvegar sýndur beint á ITV Sport. Ríkissjónvarpið okkar lagði sunnudagskvöldið undir leikinn og bull um leikinn. Norrænu stöðvarnar voga sér ekki að bjóða sínu fólki upp á svona dagskrá. Enda kæmust þær aldrei upp með það. Svo hafa stjórnendur þar líklega dálitla sómatilfinningu til að bera gagnvart viðskiptavinum stöðvanna, – vinnuveitendum sínum.

Landinn brást ekki. loksins þegar hann komast í dagskránni fyrir fótboltanum á sunnudagskvöld (10.06.2012). Gísli og aðrir umsjónarmenn eru afar naskir og fundvísir á áhugavert efni víðsvegar um landið og miðin. Svo er líka hægt að hafa gaman af Borgen (ekki Bóen eins og dagskrárkynnir ævinlega segir) jafnvel þótt maður hafi alls ekki horft á alla þættina.

Það var dálítið undarlegt fréttamat hjá Ríkísútvarpinu að í fjögurfréttum á föstudag (08.06.2012) skyldi það vera fyrsta frétt að þingflokksformaður Sjálfstæðisflokksins vildi láta leggja samningaviðræður við ESB til hliðar. Það hefur verið vitað í margar vikur og var engin frétt.

Danska sjónvarpið DR1 sýndi fréttir í hálfleik, Rússland – Tékkland (08.06.2012) . Íslenska Ríkissjónvarpið var með fótboltabull og auglýsingar. Það tekur almannaþjónustuhlutverk sitt mjög alvarlega.

Úr mbl.is (08.06.2012): Stúlkunni vantaði 40 krónur til að eiga fyrir farinu, en bílstjórinn neitaði henni um far. Það var og. Henni vantaði. Mbl.is þarf að vanda sig svolítið meira. Stúlkuna vantaði 40 krónur.

Það eru mikil mistök og vond dagskrárgerð hjá Ríkissjónvarpinu að ætla að vera með forsetaframbjóðendur í einhverskonar umræðuþætti kvöldið fyrir kjördag. Slíkur þáttur ætti að vera á dagskrá tveimur dögum fyrir kjördag. Reynslan af síðasta umræðuþætti frambjóðenda í Ríkisjónvarpinu var vond. Núverandi forseta var liðið átölulaust að vaða elginn næstum endalaust og tala aðra keppendur í kaf. Það var frekja og stjórnleysi.

Skotfóturinn hefur ekki verið heitur hjá honum í dag, sagði einn af óteljandi ,,sérfræðingum” (09.06.2012) sem Ríkissjónvarpið hefur ráðið til að miðla þjóðinni fróðleik um fótbolta. Annað gullkorn úr lýsingu: Þeir verða að passa sig að fá ekki markið í bakið á sér ! Heimilisfólk Molaskrifara hallaði sér að lýsingu þulanna hjá BBC á seinni hluta leiksins. Þeir kunna sitt fag. Þeir sem annast fótboltalýsingar hjá Ríkissjónvarpinu gætu lært talsvert af Bretum í þessu efni, – reyndar Dönum líka.

Það var sitthvað skrítið við fréttatíma Ríkisútvarpsins á miðnætti á laugardag (09.06.2012). Fyrst voru fréttir kynntar. Þá kom langt hlé og ekkert gerðist. Svo kom fyrsta frétt og eftir það mörg hlé og löng áður en fréttatíminn komst á eðlilegt skrið undir lokin. Engar skýringar. Voru kannski nýliðar að æfa sig á útsendingu ? Það var engu líkara.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – . ESG

Víða um heim fjalla fjölmiðlar um það hve Íslendingar hafi verið fljótir að rétta úr kútnum og komast á skrið að nýju eftir hrun. Þetta vekur víða aðdáun. Fréttir af efnahagsbatanum hafa borist til margra landa í öllum álfum. Samt hafa þær enn ekki náð upp í Hádegismóa við Rauðavatn austast í Reykjavík þar sem Morgunblaðið er soðið saman. Þar sér ekki enn til sólar þótt sólargangur sé senn hvað lengstur á landi hér. Í móunum við Rauðavatn ríkir kreppan ein.

Molaskrifari horfði á auglýsingu í breska ITV sjónvarpinu. Þar var verið að auglýsa betri baðherbergi. Þannig baðherbergi voru í tísku á Íslandi fyrir meira en aldarfjórðungi, (sjá betterbathrooms.com.) En þetta varð hinsvegar til þess að Molaskrifari festist við að horfa á góðan krimma um rannsóknarlögreglumanninn Lewis, sem aldrei bregst. Lewis þættirnir eru með bitastæðasta erlenda efni sem kemur á skjáinn úr Efstaleiti.

Um mótmælafundinn á Austurvelli (07.06.2012) sagði Stöð tvö að þar hefðu verið mörg þúsund manns. Aðrir fjölmiðlar töluðu um tvö þúsund manns.

Á vef Ríkisútvarpsins er ekki talað um sjónvarp. Þar er kynning á dagskrá Rásar 1 , Rásar 2 og RÚV. Dæmalaust rugl!

Í tíufréttum Ríkissjónvarps (06.06.2012) var sagt: Farið var í gegnum Möðrudal og inn á veg … Hvernig er farið í gegnum Möðrudal? Fróðlegt væri að fá skýringar á því.

Eiríkur vitnar í Morgunblaðið (07.06.2012), en þar segir í viðtali: „Margir eru með mikla menntun á bakinu en aðrir eru kannski með 30 ára starfsreynslu á bakinu. Það er til dæmis ekki hægt að lýsa slíkri reynslu í einni línu í ferilskránni heldur er mikilvægt að viðkomandi lýsi því hvað gerðist á þessum 30 árum,“ útskýrir María. Eiríkur skrifar: „Mér finnst þetta ,,á bakinu“ vera óþarfa viðbót og heldur leiðinlega að orði komist. Eða safnast menntun og starfsreynsla í einhvern kút á baki fólks?” Réttmæt ábending. ´

Kristján skrifaði þessa athugasemd við Mola: „Næstu vikur hér á RÚV, verða svona: Fótbolti – auglýsingar (aðallega bjór og bílar) – kynningarstef EM mótsins sýnt aftur og aftur og aftur – strákar að blaðra í myndveri – kynning á blaðri stráka í myndveri – fleiri auglýsingar – dagskrárkynningar hér á RÚV konunnar osfrv.” . Þetta er því miður rétt hjá Kristjáni. Illa er nú komið fyrir hinni ágætu stofnun, Ríkisútvarpinu, sem einu sinni var. Meira að segja hefur stjórnendum tekist að bannfæra hið lögbundna og ágæta nafn Ríkisútvarp. Ekkert þar á bæ má tengjast neinu sem heitir ríki, – engu líka en stjórnendur líti á stofnunina sem einkafyrirtæki sem þeim sé frjálst að ráðskast með að vild. Svo er reyndar ekki.

Eina norræna stöðin af þeim sjö sem aðgengilegar eru hjá sjónvarpi Símans sýndi leik Pólverja og Grikklands í beinni útsendingu var SVT 2 (08.09.2012), – fyrir utan Ríkissjónvarpið okkar sem ryður öllu út fyrir fótboltann eins og ævinlega.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – . ESG

Ekki er vitað til þess að nokkur sjónvarpsstöð sé jafn fótboltafíkin og Ríkissjónvarpið okkar. Þar ræður íþróttadeildin öllu. Fimm og hálfa klukkustund af fótaboltaefna fá nefskattsgreiðendur nauðungarstöðvarinnar framan í sig í dag, – kjósi þeir að horfa á sjónvarp. Hér hefur áður verið sagt að sjálfsagt er að sýna leiki frá EM. En hið sjálfumglaða endalausa og innihaldslausa kjaftæði sjálfskipaðra sérfræðinga sem Ríkissjónvarpið telur sér skylt að halda að okkur á ekkert erindi á skjáinn. Og ekki bæta heldur hallærislegar montkynningar á þessum kjaftaþáttum úr skák.

Stöð tvö var með frétt um vildarpunkta og opinbera starfsmenn (06.06.2012). Þar talaði fréttamaður um economy class, – það er venjulega kallað almennt farrými á íslensku.

Það var dómgreindarbrestur fréttastofu Ríkisútvarpsins að hafa sem fyrstu frétt (06.06.2012) grátandi móður mikið veikrar ungrar stúlku sem oft hefur reynt að svipta sig lífi. Þessi frétt var ekki vel unnin og átti ekki að vera burðarfrétt fréttatímans í þeirri mynd sem hún var flutt.

Það er fengur að norsku heimildaþáttaröðinni, sem kölluð er Kalt kapphlaup sem Ríkissjónvarpið er að sýna. Þar er fjallað um nýja stöðu á norðurslóðum bráðnun íss og nýtt aðgengi að miklum auðlindum. Þetta eru vandaðir þættir.

Molaskrifari heyrði ekki betur en þátturinn sem sýndar var sl. þriðjudag (05.06.2012) væri kynntur sem lokaþáttur. Í lok þáttarins var hinsvegar boðaðir nýr þáttur, sá fjórði, sem líklega er lokaþátturinn.

Lesandi Mola sendir tilvitnun í frétt í Morgunblaðinu (06.06.2012) og segir: „Skrýtnir eru Breiðhyltingar. Aðrir eru með skolplagnir frá húsum sínum, en heimæðar fyrir heitt og kalt vatn.“ Frétt Morgunblaðsins byrjar svona: Rætur aspartrjáa hafa valdið miklum usla í Breiðholti síðustu misseri. Asparræturnar hafa stíflað heimæðar skólps og dæmi eru um að skólp komi upp um klósett í nágrenni skemmdra lagna. Reyndar virðast skolplagnirnar hafa verið einskonar heimæðar í þessum tilvikum!

Sagt var frá sýningu í sexfréttum Ríkisútvarps (06.06.2012): Sýningin verður í … Hún opnar .. Þetta er erfitt!

Molaskrifari er svolítið hugsi yfir botnlausri hneykslun fréttamanna sjónvarpsstöðvanna á því að borgarfulltrúi skuli hafa þegið boð æskuvinar um að fara með í fyrstu flugferð nýs flugfélags. Mjög hefur verið vitnað í siðareglur. Molaskrifara finnst svolítil tvískinnungskeimur af þessu. Hvaða siðareglur gilda um fréttamenn í þessu tilliti? Hvað segja þeirra siðareglur um að þiggja gjafir af þeim sem um er fjallað? Oft sjáum við og heyrum fréttamenn þakka fyrir sig með fréttum og greinaskrifum, t.d. þegar flug hefst á nýjum leiðum. Það er ekki ný bóla. Sá grunur læðist líka að manni að fréttamönnum og dagskrárgerðarmönnum séu færðar að gjöf bækur og hljómplötur til að fjalla um í dagskrá. Hvaða reglur gilda um þetta? Fróðlegt væri að fræðast svolítið um það. Hinsvegar er það auðvitað arfavitlaust að halda því fram að siðareglur gildi bara frá 9 til 5. Lítið betra er að segja að réttlæting ferðar sé sú að rætt hafi verið um ferðamál yfir glasi í hálftíma eða klukkutíma í íslenska sendiráðinu í París!

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – . ESG

Í morgunfréttum Ríkisútvarpsins (05.06.2012) var sagt: Slökkviliðið fékk tilkynningu um eldinn þegar klukkan var tuttugu og fimm mínútur í sex. Molaskrifari áttar sig ekki á því hvort klukkan var tuttugu og fimm mínútur gengin í sex eða hvort klukkuna vantaði tuttugu og fimm mínútur í sex. Óskýrt.

Eiríkur sendi eftirfarandi (06.06.2012): „Hér að neðan er skelfileg fyrirsögn á viðtali í Morgunblaðinu, við landsliðskonu í knattspyrnu sem var að skipta um félag. Hólmfríður seldi mér liðið

Þar sem mikill fjöldi barna og unglinga stundar íþróttir og les þar af leiðandi umfjöllun um þær er sérstaklega mikilvægt að vanda orðfar sitt í íþróttafréttum. Þar er hins vegar pottur brotinn og eru vefmiðlarnir verstir. Fotbolti.net slær þar flestum öðrum við í sóðaskap, slæmu málfari og enskuslettum. Því miður er það mjög vinsæll vefur.” – Molaskrifari þakkar Eiríki sendinguna.

Molalesandi sendi eftirfarandi réttmæta ábendingu (visir.is 05. 06. 2012):

,,Guðmundur Kristjánsson, eigandi útgerðarfyrirtækisins Brims, þaggaði niður í Jóni Gunnarssyni, þingmanni Sjálfstæðisflokksins, á fundi Brims með sjómönnum og fiskverkafólki á Miðbakkanum í dag. Þótt Steingrími J. Sigfússyni, sjávarútvegs- og landbúnaðarráðherra, hafi verið boðið auk þingmanna var fundurinn aðallega til upplýsinga fyrir starfsfólk Brims.

„Nei, við töluðum um þetta í símann og þetta er bara ekki í boði,“ sagði Guðmundur þegar Jón Gunnarsson hugðist bera upp spurningu. Fundurinn var annars fjölsóttur en þar fór Guðmundur yfir mat stjórnenda fyrirtækisins á áhrifum frumvarpa um fiskveiðistjórnunarkerfið og auðlindagjald á rekstur fyrirtækisins. – Þú þaggar ekki niður í einhverjum sem ekki hefur tekið til máls. Því síður ef fundarstjóri hefur ekki gefið viðkomandi orðið.”

… að fjöldi erlendra stjórnarerindreka verði visað úr landi var sagt bæði í útvarps- og sjónvarpsfréttum Ríkisútvarpsins (05.06.2012). Hér hefði auðvitað átt að tala um að fjölda erlendra stjórnarerindreka yrði vísað úr landi.

Ómerkilegur kjaftaþáttur um knattspyrnu í Ríkissjónvarpinu á besta tíma á þriðjudagskvöldi (05.06.2012). Það segir sitt um hvernig komið er fyrir stjórendum þessa mikilvæga almannafyrirtæki að þeir telja sig þurfa að gera meira fyrir áhugamenn um knattsyrnu en alla aðra viðskiptavini sína. Ekkert er að því að sýna helstu leikina úr EM. Það þarf ekki að ræða. En það á ekki að snúa allri dagskránni á haus vegna knattspyrnumóts og sýna endalausa froðusnakksþætti um fótbolta auk sjálfra leikjanna.

Bíð eftir því að Ríkissjónvarpið endursýni sjónvarpsviðtalið frá þingsetningunni í fyrra, þegar Andrea J. Ólafsdóttir, nú forsetaframbjóðandi lýsti mikilli ánægju sinni með að ýmsu lauslegu var kastað í þingmenn á leið milli þinghúss og dómkirkju. Viðtalið sem sýnt var í beinni útsendingu virðist hafa verið fjarlægt af vef Ríkisútvarpsins. Hvað veldur?

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – . ESG

Kvikmynd var framleidd hér á landi síðasta sumar og þrjú verkefni eru væntanleg til landsins á næstunni, – var okkur sagt í kvöldfréttum Ríkiasútvarpsins (03.06.2012).

Morgunblaðið sagði okkur lesendum sínum nýlega að útkoma bókar Halls Hallssonar Váfugls á ensku hafi þótt stórtíðindi í Bretlandi. Formaður Sjálfstæðisflokksins var meira að segja viðstaddur áróðurskynningu sem sviðsett var í breska þinghúsinu.

Bókin kom út hjá forlagi, Bretwalda Books, þar sem höfundar eða aðilar á þeirra vegum kosta útgáfuna oftast að mestu sjálfir. Bók Halls er samfelld haturs- og áróðursferð gegn Evrópusambandinu og mikil áhersla lögð á að ESB ætli sér að ná algjörum yfirráðum yfir fiskimiðum Íslendinga. Það skyldi þó ekki vera að kvótagreifar LÍÚ hafi kostað bresku útgáfuna að öllu eða að hluta?

Kunnur breskur öfgamaður, Dan Hannan segir að bók Halls Hallssonar sé merkasta bók sem komið hafi frá Íslandi síðan Halldór Laxness skrifaði Sjálfstætt fólk !!! Oflof er mesta háð sem hugast getur. Maðurinn segir: „The best book to have come out of Iceland since Nobel Prize-winning Independent People. Better, in some ways, because this one really is in favour of Icelanders being independent people.“ Hvers á Hallur Hallsson að gjalda? Betri en Halldór Laxness ? Þetta er eiginlega ekki fyndið. Gert hefur verið kynningarmyndband um bókina og því dreift á netinu. Þar rekur hver sögufölsunin rekur aðra. Hér geta Molalesendur séð og heyrt þessi ósköp ásamt viðtali við höfundinn:

http://www.youtube.com/watch?v=yBL9ln2jAyQ og http://www.youtube.com/watch?v=9TE9vGuGkWA&feature=related

Morgunblaðið hagaði sér eins og kjáni í þessu máli. Það er reyndar ekki nýtt að Morgunblaðið sleppi sér þegar kemur að umræðu um Evrópusambandið.

Hvaða rugl er það hjá auglýsingadeild Ríkissjónvarps að auglýsa á sunnudagskvöldi tónleika sem fram fóru fyrr um daginn (03.06.2012)? Reyndar ekki í fyrsta skipti sem svipað gerist.

Líklega mundu flestir Danir standa á gati ef þeir væru spurðir hvaða sjónvarpsþættir bóen væru, sem þannig eru kynntir í Ríkissjónvarpinu og sýndir á sunnudagskvöldum.

Í auglýsingu frá AGA-gas sem lesin er í Ríkissjónvarpi er sagt: Athugaðu þinn búnað einu sinni á ári. Þetta er ekki eðlileg orðaröð í íslensku. Athugaðu búnað þinn, er eðlileg orðaröð.

Í sjónvarpsdagskrá í dagblöðum var skrifað (04.06.2012) um norskan sjónvarpsþátt. Ástralska skáldkonan Kate Morton hefur selt mörg hundruð þúsund bækur í Noregi. Átt er við að bækur sem þessi kona hefur skrifað hafi selst í mörg hundruð þúsund eintaka upplagi í Noregi. Það er bara rugl að segja okkur að Kate Morton hafi selt mörg hundruð þúsund bækur í Noregi.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – . ESG