Í hádegisfréttum Ríkisútvarps (02.05.2013) var frétt um strandveiðar. Sagt var frá versnandi veðri vestanlands og að margir hefðu þegar róið í land aftur. Molaskrifari er á því að sögnin að róa hafi ekki verið á réttum stað þarna. Það réru margir í morgun, fóru á sjó, héldu til veiða. Þegar menn hverfa frá vegna veðurs róa þeir ekki í land ( nema á árabátum, sem ekki eru mikið notaðir til strandveiða. ) menn snúa við, halda aftur í land.

Gunnar skrifaði (02.05.2013): „… að skjóta táragösum um allt …“ sagði Andri Freyr á Rás 2 áðan. Er hægt að bjóða hlustendum svona lágkúru fimm daga vikunnar? – Nei Gunnar . þetta er óboðlegt, en samt bjóða stjórnendur Ríkisútvarpsins okkur upp á þetta! Og nú dynja á okkur látlausar sjónvarpsauglýsingar um sjónvarpsþætti þessa sama starfsmanns. Það er tilhlökkunarefni !

Frétt ársins var á visir.is í dag. Sigmundur Davíð og Bjarni Ben. borðuðu vöfflur! http://www.visir.is/fengu-ser-vofflur-med-kaffinu/article/2013130509559

,, Sigmundur Davíð Gunnlaugsson, formaður Framsóknarflokksins, og Bjarni Benediktsson, formaður Sjálfstæðisflokksins, borðuðu vöfflur með kaffinu í dag, samkvæmt upplýsingum frá Jóhannesi Þ. Skúlasyni, aðstoðarmanni Sigmundar Davíðs.” Eru fréttaskrifarar á visir. is alveg búnir að missa stjórn á sér? Fáránlegt.

Þetta er upphafið á illa skrifaðri frétt á visir.is (02.05.2013): ,,Hagnaður hvers Porsche bíls er 16 sinnum hærri en af Volkswagen bíl.

Þýski lúxusbílaframleiðandanum Porsche gengur flest í haginn og eykur sölu bíla sinna stöðugt á hverjum ársfjórðungi.” Porsche bílar græða ekki. Það er framleiðandi þeirra sem hagnast. Honum gengur flest í haginn, hann gengur ekki flest í haginn. Hroðvirkni.

http://www.visir.is/porsche-selur-fleiri-cayenne-en-allar-adrar-gerdir/article/2013130509869

Vínið er hægt að versla á lækkuðu verði … auglýsir hinn ágæti Bændamarkaður frú Laugu á fésbókinni (03.05.2013) . Átt er við að vínið sé hægt að kaupa á lækkuðu verði … Þetta er ekki eina dæmið um ranga orðanotkun sem Molaskrifari hef séð á fésbók. Þar er líka auglýsing um garðáburð , frá Húsasmiðjunni: Verslaðu þér Blákraft fyrir garðræktina í sumar á betra verði. Hörmulegt. Verslaðu þér … Betra verði en hvað?

Ríkissjónvarpið heldur uppteknum hætti og leynir áhorfendur því þegar verið er að endursýna kvikmyndir. Á föstudagskvöld sagði niðursoðna konuröddin sem kynnir dagskrána ekki frá því að verið væri að endursýna kvikmyndina Hefndina. Dónaskapur. Hún hefði átt að segja við okkur: Myndin var áður sýnd (dagsetning). Kannski væri ráð að skipa sérstaka nefnd til að kenna yfir mönnum Ríkisútvarpsins að sýna okkur kurteisi, – og hroka.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Enn einu sinni var aðalfréttatími Ríkissjónvarpsins skorinn niður við trog á föstudagskvöld (03.05.2013) vegna íþrótta. Það er eins og forráðamenn Ríkissjónvarpsins haldi að öll þjóðin standi á öndinni vegna eins handboltaleiks. Enn sannast að íþróttadeildin ræður dagskránni þegar henni svo sýnist. Nöturleg staðreynd. Hversvegna er íþróttarásin ekki notuð?

Óformleg samskipti áttu sér stað milli formanna Framsóknarflokks og Sjálfstæðisflokks í dag (03.05.2013) sagði Ríkissjónvarpið. Ja, hérna. Er þetta ekki heimsfrétt? Svo kom nú reyndar í ljós að engin samskipti höfðu átt sér stað. Það fullyrti formaður Sjálfstæðisflokksins. Hann ætti að vita það. Það er eins og fréttastofa Ríkisútvarpsins sé að fara á taugum, eins og sagt er.

Undarlegt var í fréttum sjónvarpsstöðvanna (03.05.2013) af ólöglegu skógarhöggi íbúa við Rituhóla í Reykjavík að ekki skyldi rætt við neinn íbúanna,sem báru ábyrgð á skemmdarverkinu. Það hefði til dæmis mátt ræða við fyrrverandi alþingismanninn Árna Johnsen, sem býr í Rituhólum og hefur aldrei verið fjölmiðlafælinn. Aðeins var rætt við fulltrúa Reykjavíkurborgar.

Í Spegli Ríkisútvarpsins (30.04.2013) var sagt frá ámælisverðri framkomu eigenda nýs hótels á Nesjavöllum við erlent starfsfólk. Í Íslandi í dag næstum á sama tíma á Stöð tvö var mikill halelúja þáttur um þetta sama hótel, sem umsjónarmaður hvað eftir annað kallaði rosalega ,,hipp og kúl”. Skálaði svo í kampavíni við hótelstjórann. Þar var ekkert minnst á erlenda starfsmenn. Hástemmdur lofsöngur. Svo var slett ensku í annarri hvorri setningu eða því sem næst. Það var ekki til bóta. Kvöldið eftir var svo fjallað um málið í fréttum Stöðvar tvö. Hótelstjórinn lýsti þar sakleysi sínu.

Í fréttum Stöðvar tvö var sagt um Hollandsdrottningu að hún hefði ánafnað syni sínum embættinu, en hún afsalaði sér völdum á þriðjudag (30.04.2013) til sonar síns. Þetta var að mati Molaskrifara ekki rétt notkun sagnarinnar að ánafna sem þýðir að arfleiða að einhverju.

Í kvöldfréttum Ríkisútvarps (01.05.2013) var talað um að mæta á kröfugöngur. Ekki er Molaskrifari sáttur við það orðalag. Venjulega er talað um að mæta í kröfugöngu, – ekki á. Í fjögur fréttum var sagt um Sigmund Davíð, – ekki er að vænta yfirlýsingu frá honum í kvöld. Rétt hefði verið: Ekki er að vænta yfirlýsingar frá honum í kvöld.

Góðvinur Molanna sendi eftirfarandi (01.05.2013): ,,Ágæti molaskrifari. Í fyrirsögn á dv.is segir „Flugvél í nærárekstri við óþekktan fljúgandi hlut.“ Já, einmitt, flugvélin lenti sem sagt í „nærárekstri“ eða þannig skil ég fyrirsögnina og er væntanlega einn um það. Þetta er litið alvarlegum augum ytra því, eins og segir í fréttinni „Nærárekstranefnd Bretlands tók málið til umfjöllunar“ og Nærárekstranefndin fjallar væntanlega ekki um lítilfjörleg atvik. Ég leyfi öðrum fjólum þessarar merkilegu fréttar að hvíla í friði.” Molaskrifari þakkar sendinguna.

Óskar Þór Halldórsson skrifaði (02.05.2013): ,,Sæll Eiður,

Á vef Viðskiptablaðsins í dag, 2. maí, má lesa þessa fyrirsögn:

Afkoma Danske Bank dregst saman

Þetta særir mína málvitund. Í mínum huga annað hvort batnar afkoma Danske Bank og annarra fyrirtækja eða hún versnar. En tæplega dregst hún saman!”

Rétt athugað, Óskar Þór. Þakka bréfið.

Í bíó auglýsingu á Stöð tvö (01.05.2013) var talað um staðinn þar sem örlög þeirra mætast. Óskiljanlegt. Ef til vill er átt við staðinn þar sem þeir mæta örlögum sínum. Var kannski Gúggli að þýða?

Fyrirsögn, Pressan, eyjan.is (01.05.2013): Össur myndar ríkisstjórn fyrir opnum tjöldum: Fjögur rök hans fyrir miðjustjórn. Ætti að vera: Fern rök hans fyrir miðjustjórn.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Þorgils Hlynur Þorbergsson sendi þessa athugasemd (30.04.2013):

,,Á netmiðlinum pressan.is stóð: Brynjar afsakar hrokann. Þá hafði hann (Brynjar Níelsson, nýkjörinn þingmaður Sjálfstæðisflokksins) verið i viðtali í þættinum Harmageddon á ágætri útvarpsstöð, X-inu, þar sem hann sagði skoðun sína á náttúruvernd. Baðst Brynjar ekki frekar afsökunar á hroka sínum? Það að afsaka eitthvað eða einhvern, þar með talinn sjálfan sig, er alls ekki það sama og að biðjast afsökunar. Rétt ætti þetta að vera svona: „Brynjar biðst afsökunar á hroka sínum“. Á þessu tvennu er munur. Það væri frekar að útvarpsmennirnir afsökuðu hrokann í Brynjari eða Brynjar afsakaði sig með þeim orðum að hann væri bara svona. Að afsaka og biðjast afsökunar er ekki alveg það sama. Kjarninn er sem sagt þessi: Að afsaka sig eða einhvern annan merkir að finna sjálfum sér eða einhverjum öðrum einhverjar málsbætur, en að biðjast afsökunar er að viðurkenna mistök sín og leita sátta. Það verður að viðurkennast að hann hljóp á sig, hann Brynjar, og enginn afsakar það. Mig langaði aðeins til þess að benda á þetta”. Molaskrifari þakkar þessa ágætu ábendingu.

Í framhaldi af því sem sagt var um handboltaútsendingu í Molum gærdagsins skrifar Egill (02.05.2013): ,, Handboltaleikurinn var á tímabili sýndur á allt að 5 stöðvum á sama tíma í gær. RÚV, RÚV+, RÚV-HD, RÚV-Aukarás og SportTV. Ég gæti hafa ruglast þegar ég var að stilla á milli stöðva, en þetta jaðraði við fáránleika. Þetta átti ekki að vera á aðalrás Ríkissjónvarpsins, frekar en aðrir íþróttakappleikir. Það er meira en nóg af íþróttum fyrir á þeirri stöð, til hvers að vera þá með sér íþróttarás?

Svo sá ég á vefsíðu SportTV setninguna: „Keflavík unnu leikinn í kvöld á móti KR …“ Ótrúlegt að sjá svona! “ – Molaskrifari þakkar Agli sendinguna. Enn einu sinni sannast að Ríkisútvarpið er stjórnlaus stofnun. Enn meiri  handbolti á aðalrásinni í kvöld. Til hvers er aukarásin?

Gunnar skrifaði Molum (30.04.2013): ,,Jakob Bjarnar skrifar á visir.is: „Gríðarlega öflug sprengja sprakk í miðborg Prag, höfuðborg Tékklands, í morgun.“ Síðar í „fréttinni“ kemur fram að þetta var ekki sprengja, heldur afleiðing gasleka. Þó heldur Jakob áfram: „Sprengingin sprakk nálægt þjóðleikhúsi Tékka í námunda við Vltava-á.“ Það var og! Moldá heitir nú „Vltava-á“ á íslensku. Hann heldur áfram: „… og bygging við Divadelni St gereyðilegðist.“ Gatan heitir Divadelni, ekki „Divadelni St“, en bæta mætti orðinu „-gata“ fyrir aftan nafnið í fréttinni, ekki „St“. Fleiri ambögur er að finna í þessari stuttu frétt, m.a. ranga notkun á semíkommu (depilhöggi). En mesta furðu vekur að í upphaflegri frétt var sagt að Prag væri höfuðborg Tékkóslóvakíu, en merkilegt nokk … það var leiðrétt!

Svona fréttamennska er ekki boðleg!”. Það er rétt, Gunnar. Hér er það ekki eitt, heldur eiginlega allt, þar á meðal ,,sprengingin sprakk!” Þakka bréfið.

Enn býður Ríkissjónvarpið okkur upp á algjört rusl á besta tíma á föstudagskvöldi (03.05.2013). Í kvöld er okkur boðin ruslmynd sem fær einkunnina 4,5 , – falleinkunn, á IMDb. Nú er ljóst að þeim sem kaupa kvikmyndir til sýningar í Ríkissjónvarpinu er ekki sjálfrátt. Þar þarf að ráða nýtt fólk til starfa.

Húsið opnar klukkan 1400, var sagt í auglýsingu frá Samfylkingunni (01.05.2013). Þess var ekki getið hvað húsið mundi opna.

Þágufallssýkin er í sókn. Poppari skrifar ( vitnað til hans á dv.is 30.04.2013): … og hvort honum skipti það einhverju máli? Og hvort það skipti hann einhverju máli, hefði átt að standa þarna.

Undir forystu Ríkisútvarpsins tönnlast æ fleiri fjölmiðlar á þar síðustu helgi. Heyrðist í útvarpinu á þriðjudagsmorgni, muni ég rétt (30.04.2013). Þetta orðalag er hreint ekki til eftirbreytni. Hvar er þessi málfarsráðunautur?

Í fréttum Stöðvar tvö (01.05.2013) var sagt: … féll í grýttan jarðveg launamanna.

Betra hefði verið: … féll í grýttan jarðveg hjá launamönnum.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Hvar er íþróttarás Ríkissjónvarpsins? Í gærkveldi (01.05.2013) seinkaði dagskránni um næstum 45 mínútur vegna íþrótta. Ríkissjónvarpið hvorki skýrði né afsakaði seinkunina. Það sýnir áhorfendum ómældan dónaskap. Enn einu sinni. Niðursoðin konurödd kynnir dagskrána og þar er engu hægt að breyta ef eitthvað ber út af. Þetta háttlag er stjórnendum Ríkisútvarpsins til skammar. Þetta gerir engin alvörusjónvarpsstöð.

Gamall vinur og skólabróðir Molaskrifara, sem lengi hefur búið erlendis skrifaði (29.04.2013) : ,, Nú eru greinahöfundar alveg hættir að beygja nafnorð. Leti? Vanþekking? Áahugaleysi?

Úr grein Kristins E. Hrafnssonar, en í henni fjallar hann um ráðningu nýs rektors Listaháskólans, í Mbl. í dag.

Þá er nokkuð fjallað um störf hennar sem bókmennta- og menningarrýnir, rithöfundur, blaðamaður og þýðandi og greint frá störfum hennar við RÚV og þá eru tíunduð nefndarstörf.

Ég hefði látið samanburðartenginguna stýra eignarfalli: …sem bókmennta- og menningarrýnis, rithöfundar, blaðamanns og þýðanda …….

Kannski er þetta bara smekksatriði? Hvaðan í ósköpunum er þetta þá komið inn í hausinn á mér?” Molaskrifari svarar, – þú hefur greinilega orðið fyrir áhrifum frá góðum íslenskukennurum og lestri góðra bóka. Fréttamaðurinn hefur sennilega farið á mis við slík áhrif. Þakka bréfið.

Sigmundur Davíð tók daginn snemma, sagði Ríkissjónvarpið okkur (01.05.2013). Fram kom í fréttinni að hann hafði mætt í þinghúsið til fundar upp úr klukkan tíu. Ja, hérna.

Lesandi benti á þessa frétt á mbl.is (27.04.2013) http://www.mbl.is/frettir/innlent/2013/04/27/niu_ara_stulka_skorin_a_hals/

Sá sem þetta sendi spyr: ,,Er þetta orðalag skv. íslenskri málvenju og eðli máls?“ Því er skemmst til að svara að svo er auðvitað ekki. Páll Bergþórsson, veðurfræðingur, sem kann íslensku flestum betur segir á Fésbókarsíðu sinni: „Stúlka var skorin á háls“. – ,,Vita ekki fjölmiðlamenn hvað það er að skera á háls? Svo virðist ekki vera . – Það er aflífun með því að láta blæða út”.- Hárrétt.

Íslendingar halda að þeir séu mjög góðir í ensku. Nýlega var á það bent að í auglýsingu í búðarglugga í Bankastræti er talað um unpredicted weather þar sem ætti að standa unpredictable weather. Á Selfossi er málað stórum stöfum á hús: Handverk – Handcraft. Orðið handcraft er ekki rétta orðið þarna. Íslendingar eru oftar en ekki, hreint ekki eins góðir í ensku og þeir halda. En þurfa ekki að leita ráða hjá öðrum, – ekki um þetta frekar en annað.

Af fréttavef Ríkisútvarpsins (29.04.2013): Jakob Frímann Magnússon hefur ekki fengið úr því skorið hvort Davíð Stefánsson frá Fagraskógi er afi sinn. Ef málfarsráðunautur er enn starfandi hjá Ríkisútvarpinu ætti hann að spjalla svolítið við þann sem skrifaði þessa frétt! Hvort Davíð Stefánsson er afi sinn!

Ljóst er að mikill áhugi er meðal krakkanna um að ganga í skóm fullorðna fólksins, var sagt í fréttum Stöðvar tvö (29.04.2013) þar sem sagt var frá leikriti þar sem börnin leika fullorðna og fullorðnir leika börn.

Í fréttum Ríkisútvarps og sjónvarps (30.04.2013) var talað um áhættur. Orðið áhætta er ekki til í fleirtölu skv. beygingavef Árnastofnunar. Áhætta er eintöluorð. Fréttastofa Ríkisútvarpsins hefur ekkert umboð til að breyta því.

Samkvæmt okkar upplýsingum úr forsetaembættinu, sagði ábúðarmikill fréttamaður Ríkisútvarpsins (29.04.2013)á hlaðinu á Bessastöðum. Í sama fréttatíma heyrðist það sem áður hefur heyrst, að mál Bjarna Ármannssonar vegna meintra skattalagabrota verði vísað frá dómi. Máli var vísað frá dómi.

Þegar Molaskrifari skoðaði dagskrá Ríkissjónvarpsins í kvöld, fimmtudagskvöld, (02.05.2013) vaknaði spurningin: Hversvegna erum við með Ríksisjónvarp? Prísar sig sælan að eiga miða á tónleika Sinfóníuhljómsveitar Íslands í Hörpu.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Sigurður Karlsson skrifaði (27.04.2013): ,,Fréttabullið og ónákvæmnin er of mikil:

http://www.visir.is/fundu-hluta-af-lendingarbunad-thotu-sem-flaug-a-tviburaturnana/article/2013130429270

Hvað fannst hvar og hvenær,

og svo er það stafsetningin !!

Á maður ekki bara að sleppa því að lesa svona fréttasíður,

þá sefur maður betur !” Líklega er það rétt. En lítið mundi maður sofa ef allar ambögur sem sjást og heyrast í fjölmiðlum stæðu manni fyrir svefni !

Molaskrifari þakkar Sigurði sendinguna.

Brynjar skrifaði (26.04.2013): ,,Í enskumælandi löndum segir fólk gjarnan: Have a nice day.

Á Íslandi heyri maður oft: Eigðu góðan dag.

Sjá hér:

http://www.dv.is/blogg/marg/2012/2/9/ekki-eiga-godan-dag-njottu-hans-frekar/

Ég veit það ekki, en að segja við ókunnuga manneskju: ,,Njóttu dagsins“ finnst mér persónulega ekki alveg rétt.

Í dag hinsvegar var sagt við mig:

Áttu góðan dag.

Hvað finnst þér?”

Mér finnst svo sem sök sér , þegar sagt er: ,,Njóttu dagsins”. En þetta er samt lítt þörf ensk eftiröpun. En eigum við ekki að vona að góður hugur búi að baki? ,,Áttu góðan dag” er náttúrulega skelfilegt rugl. Þakka Brynjari bréfið.

Í umsögn Inga Freys Vilhjálmssonar, (sem er harðsnúinn blaðamaður) um veitingahús í DV (26.04.2013) segir: Ég fór á Steikhúsið á þriðjudaginn við tvo aðra menn. Þetta er bull. Ég fór á Steikhúsið við þriðja mann, – við fórum þrír á Steikhúsið.

Sjálfstæðisflokkurinn með skynsamar tillögur í málefnum aldraðra, skrifar bloggari á Moggabloggi (26.04.2013) Tillögur eru ekki skynsamar eða óskynsamar. Þær geta hinsvegar verið skynsamlegar eða óskynsamlegar.

Í Morgunblaðinu á kjördag (27.04.2013) var grein eftir verkfræðing þar sem fyrirsögnin var: In memorian Jóhanna og Steingrímur. Nú er ekki rétt að gera kröfur til verkfræðinga um mikla latínukunnáttu, en það flokkast nú eiginlega undir almenna þekkingu að vita að þetta ætti að vera In memoriam , – í minningu.

DV á að kalla hlutina réttu nafni. Í blaðinu á föstudag (26.04.2013) er á bls.8 eitthvað sem kallað er árétting. Þetta er ekki árétting heldur leiðrétting. Blaðið hafði nefnilega vitnað í nafngreindan mann á blaðamannafundi hjá ríkislögreglustjóra. Maðurinn var alls ekki á fundinum

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG