Helgi Haraldsson í Osló, góðvinur Molanna, bendir á eftirfarandi: Mbl 18/2-2013

http://www.mbl.is/frettir/

„Við ættum að eiga bestu skólana“

Með breyttu skipulagi skóladagsins fyrstu 4-5 árin í grunnskóla er hægt að byggja upp þá grunnfærni sem nauðsynleg er til að ná tökum á öðrum námsgreinum.

Hver skyldi hafa þýtt þetta?!

Eða er þetta haft orðrétt eftir prófessornum?.- Ja, hérna!

Molaskrifari nefndi það í tölvubréfi til Helga í Osló að hér væru hlýindi óvenjuleg,- sex til átta stiga hiti í höfuðborginni dag eftir dag. Runnar af erlendum uppruna létu blekkjast og væru farnir að bruma. Íslenska birkið léti þó ekki blekkjast. Helgi svaraði að bragði:

Stendur það í stykkinu

stolt um daga og nætur.

Ég bið að heilsa birkinu

sem blekkjast ekki lætur!

Molaskrifari þakkar Helga sendinguna. Góður kveðskapur. Kveðjunni var komið til skila í göngu í kringum Vífilsstaðavatnið (19.01.2013).

Skráðir hundar á höfuðborgarsvæðinu eru hátt í sex þúsund en hundarnir telja líklega níu þúsund, svona tók fréttamaður Stöðvar til orða (19.01.2013) á þriðjudagskvöld. Hann átti við að hundarnir væru líklega níu þúsund. Hundar telja ekki neitt. Þetta orðalag er út í hött. Lesa og læra betur.

Svo var í fréttum Ríkissjónvarps (19.01.2013) sagt frá íslenskum glæpamönnum sem hefðu verið handteknir í dönskum tukthúsum! Alltaf heyrir maður eitthvað nýtt!

Klukkan rúmlega hálf ellefu í gærkveldi (20.02.2013) bauð Ríkissjónvarpið upp á klámmynd sem kölluð var heimildamynd. Hér eru stjórnendur Ríkissjónvarpsins að feta nýjar brautir. Aldrei sjást heimildamyndir um erlend málefni eða þróun sögu og samfélaga í veröldinni. En nú er boðið upp á klám. Kannski eru æðstu stjórnendur þessarar menningarstofnunar, sem einu sinni var, nú loksins búnir að finna fjölina sína: Klám sem kallað er heimildamyndir.

Af mbl.is (19.01.2013): Um helgina hittust á þriðja tug einstaklinga saman í Háskólanum í Reykjavík … – ekki hittust saman. Komu saman eða hittust.

Mjög góður pistill var um gangbrautir á höfuðborgarsvæðinu , slæma merkingu þeirra og misræmi í merkingum í fréttum Stöðvar tvö (19.01.2013). Yfirvöld þurfa að lagfæra þetta. Núverandi ástand hefur mikla slysahættu í för með sér. Þetta ætti að vera tiltöluleg einfalt mál að kippa í liðinn. Borgarstjórn Reykjavíkur ætti frekar að ræða þessi mál en hassbúlluhugmyndir. Molaskrifari upplifði reyndar gagnbrautarháska daginn eftir umfjöllun Stöðvar tvö. Þar sem Ásabraut í Garðabæ endar við Vífilsstaðaveg eru gangbrautarmerki, en engin sebrastrik á götunni. Molaskrifari heyrði mikinn hvin í lofti er hann var að fara yfir götuna. Aðvífandi kom svartur Range Rover sennilega á 80/90 km hraða ( þarna er 50 km hámarkshraði). Ökumaðurinn talaði án afláts í símann. Greinilega ekki haft ráð á að kaupa handfrjálsan búnað. Molaskrifari átti fótum fjör að launa.

Helga Árna skrifar (19.01.2013): ,,Heill og sæll Eiður. Enn og aftur gengur fram af mér. Frá ritstjórn D.V. í dag 19.2 kemur þessi klausa; ,,Í dag verður tekin ákvörðun um það hvort að Oscar fær að vera látinn laus“..Æ,æ,æ, hvað næst?? Kveðja Helga Árna.”. Molaskrifari þakkar Helgu á bendinguna. Von er að spurt sé: Hvað næst?

Það orkar mjög tvímælis hvort ógeðfelld ofbeldisdýrkun og slagsmál eins og sýnd voru í Kastljósi á þriðjudagskvöld (19.02.2013) strax að loknum fréttum eiga erindi í fréttaskýringaþátt. Molaskrifari er á því að þetta efni hafi ekki átt neitt erindi í Kastljós á tíma sem börn gjarnan eru að horfa. Skiptir þá engu þótt varað hafi verið myndunum. Mistök.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, – ESG

Skrítin frétt á Stöð tvö (18.02.2013) Leikskólakennari framvísaði ógildu strætókorti og var vísað út úr strætó með 19 leikskólabörn. Í viðtali við Stöð tvö virtist kennarinn ekkert sjá athugavert við að nota ógilt kort til að ferðast með 19 börn í strætó. Tæpast góð fyrirmynd fyrir börnin. Talsmaður Strætó sagði að bæði kennarinn og bílstjórinn hefðu mátt sýna betri dómgreind. Sjálfsagt rétt. Síðan sagði fréttamaður Stöðvar að talsmaður Strætó hefði beðið börnin afsökunar á ómakinu ! Ómak er umstang eða ónæði. Eðlilegra hefði verið að segja að hann hefði beðið börnin afsökunar á þessu atviki. En hefði kennarinn ekki átt að biðja börnin afsökunar?

Molaskrifari horfði á hluta útsendingar frá afhendingu Edduverðlauna í Hörpu. Kunni lítt að meta undarlegt kossaflens á sviðinu. Aðallega hallærislegt. Hann játar fúslega að hafa aldrei heyrt svonefndan ,,Sjónvarpsmann ársins” nefndan og hefur ekki hugmynd hvað sá hefur til síns ágætis. Hefur raunar hitt ýmsa sem standa líka á gati. Voru hér brögð í tafli? Hvernig féllu atkvæði? Þarna voru tilnefndir ýmsir t.d. úr Kastljósi sem unnið hafa frábærlega vel og eiga heiður skilinn. Þetta var allt hálffáránlegt, – og eiginlega meira en það.

Það var undarlegt í Silfri Egils (17.02.2013) að heyra varaformann Framsóknarflokksins fullyrða að Sviss vildi komast inn í EES! Þetta er tilhæfulaus fullyrðing einsog þeir vita sem fylgjast svolítið með þróun mála í Evrópu. Sviss hefur svo hagstæðan tvíhliða samning við ESB að sambærilegur samningur verður aldrei gerður aftur. Í Silfrinu hreyfði enginn andmælum. Vissi fólk ekki betur? Það er slæmt þegar farið er rangt með staðreyndir í þáttum af þessu tagi.

Undarlegt er hve margir tala um þjóðaratkvæðagreiðslu, þegar átt er við skoðanakönnun sem fram fór um afstöðu fólks til tillagna Stjórnlagaráðs. Þær spurningar sem afstaða fólks var könnuð til voru óljósar og ómarkvissar.

Nú er komið í ljós að það var aðeins í tilefni af degi táknmálsins að viðtöl voru textuð í fréttum Ríkissjónvarpsins. Áhugaverðar umræður á Fb (19.02.2013) vegna greinar Gísla Ásgeirssonar: http://malbeinid.wordpress.com/2013/02/19/textun-frettatima-ruv/ Þessu þarf að hrinda í framkvæmd. Gott hefði til dæmis verið að texta viðtalið við telpurnar á Akureyri sem unnu það afrek að bjarga stöllu sinni sem féll niður um ís sem brotnaði undan henni og var hætt komin (19.01.2013).

Blaðamaður sendi eftirfarandi (18.02.2013) ,,Það stingur alltaf í augu þegar dauðum hlutum er fengið líf í frásögnum. Hvernig getur flugvél Landhelgisgæslunnar komið auga á eitthvað – sjá hér að neðan? (Ef til vill er þessi kansellístíll hugsaður til þess að skapa einhverja fjarlægð – það er að einstaka menn skyggi ekki á Gæsluna eða verkefni hennar. Ætli karla eins og Guðmundar Kjærnested væri í nokkru getið væri þorskastríð fyrir ströndum í dag. Með sama hætti; ég vil þekkja lögregluþjónana í miðbænum með nafni og geta rabbað við þá, vita hverjir séu flugstjórarnir ef ég flýg út á land, og ekkert verra að vita hver er í brúnni þegar Fossarnir sigla inn Sundin. Skrautbúin skip fyrir landi færandi varninginn heim!)

http://www.visir.is/krosslaga-rekald-vekur-athygli-landhelgisgaeslunnar/article/2013130219157 ,,Flugvél Landhelgisgæslunnar, TF-SIF, kom auga á stórt, krosslaga rekald í hefðbundnu gæslu- og eftirlitsflugi sínu í vikunni.

Á vef Landhelgisgæslunnar kemur fram að hluturinn sé 15 sinnum sex metrar á kant og staðsett 33 sjómílur vestur-suðvestur af Reykjanesi.” Hér má bæta við að rekaldið,sem í fréttinni er kallað ,,hluturinn” er ekki staðsett heldur staðsettur.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, – ESG

Molaskrifari átti skemmtilega stund í Háskólanum í Reykjavík í liðinni viku. Þar spjallaði hann í rúmlega klukkustund við nemendur sem sækja námskeið í hagnýtri notkun íslensku og ensku. Þetta unga fólk var áhugasamt og spurði um allt milli himins og jarðar. Stundum skorti sjálfsagt á að svörin væru fullnægjandi, en hvað um það. Ég skynjaði að þetta unga fólk vildi gera vel og vanda sig og þótti vænt um móðurmálið.

Ég hef verið að bögglast með að finna nothæfa þýðingu á enska orðtakinu; damned if you do, damned if you don´t. Efnislega, ef þú gerið eitthvað ertu í klandri, en ef þú gerir það ekki, ertu líka í klandri. Tilefnið er fréttir af launadeilu hjúkrunarfræðinga. Hvað hefði verið sagt við stjórnvöld sem hefðu setið með hendur í skauti og horft á helming hjúkrunarfræðinga á Landspítala ganga út og hverfa til annarra starfa? Nú er djöflast á stjórnvöldum vegna þess að komið var til móts við kröfur hjúkrunarfræðinga að hluta, því nú muni allrar aðrar stéttir koma með kröfur í kjölfarið. – Það er víst vandlifað í henni veröld eins og þar segir.

Molaskrifari lærði nýja orðskýringu við lestur Reykjavíkurbréf Moggans um helgina. En þar var sagt að kosningar til Evrópuþings væru eins og hver önnur forarvilpa! Eru kosningar ekki eitthvað sem því tengjum lýðræðinu? Það er samkvæmt þessu heldur vont stjórnarform. Kannski gildir þetta aðeins um Evrópuþingskosningar, – því í Mogga er amast við svo mörgu sem tengist samstarfi Evrópuríkja? En býður Morgunblaðið betra stjórnarform en lýðræði með frjálsum kosningum ?

Í fréttum Stöðvar tvö (17.02.2013) var sagt: Það orð sem fer af … virðist ekki við neina rök að styðjast. Ekki við nein rök að styðjast, hefði verið rétt að segja.

Sérstök ástæða er til að vekja athygli á grein sem Tryggvi Jónsson löggiltur endurskoðandi og fv. forstjóri Baugs skrifar í Morgunblaðið í dag (19.01.2013).Tryggvi spy: Er Hæstiréttur óskeikull? Molaskrifari hallast að því eftir lestur greinar Tryggva að Hæstiréttur Íslands sé óravegu frá því að vera óskeikull. Ótrúlegt mál.

Í Sunnudagsmogga er heil opna þar sem er hvítt letur á kolsvörtum grunni. Ekki veit Molaskrifari hvernig er með aðra, en honum hefur alla ævi verið lífsins ómögulegt að lesa langan texta sem er hvítur á svörtum grunni. Las endur fyrir löngu í bók um blaðamennsku að slíkt væri í lagi að gera með eina eða tvær málsgreinar en alls ekki langan texta. Hvað segja Molalesendur? Finnst þeim þægilegt að lesa hvítt á svörtu.

Í ágætu bréfi Aldísar Aðalbjarnardóttur sem birtist í Molum um málfar og miðla 1135 misritaðist ein setning. Rétt er setningin svona: ,,Áberandi hefur verið að nemendur sleppa t í miðmynd sagna, oft í framsöguhætti. Dæmi: Þeir komas alla leið. Þær reynas mér vel.” Beðist er velvirðingar á þessu.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, – ESG

Lesandi skrifar (15.02.2013):,,Sæll Eiður. Get ekki orða bundist. Veit heldur ekki hvert ég á að leita ef ekki til þín. Í grein um að Oscar Pistorius hafi banað unnustu sinni kemur fram þetta: Fyrstu fregnir af morði á kærustu hlaupastjörnunnar Oscar Pistorius gáfu það til kynna að hann hefði farið á mis við hana og innbrotsþjóf. Að hann hafi sem sagt ruglast á henni og innbrotsþjófi. Einu sinni gat maður lesið blöðin og lært af þeim hvernig á að skrifa texta. liðin tíð því miður. Kveðja frá lesanda”

http://www.dv.is/frettir/2013/2/15/thetta-kom-ekki-fra-okkur/

Rétt er það ekki hefur sá sem þetta skrifaði mikla ritleikni til að bera. Hann þarf að lesa upp og læra betur áður en honum er hleypt að lyklaborði sem veitir aðgang að fréttaskrifum á dv.is.

Úr hádegisfréttum Bylgjunnar (14.02.2013): Tæplega helmingur málanna var lokið , þegar … Enn einu sinni! Tæplega helmingi málanna var lokið, þegar ..

Það var gaman að sjá viðtalið við Sæmund Sigmundsson rútubílstjóra í Borgarnesi í fréttum Stöðvar tvö (16.02.2013). Fyrir tveimur árum fórum við í Félagi fyrrverandi alþingismanna í dagsferð um Snæfellsnesið. Sæmundur ók 64 manna rútu. Þær gerast ekki stærri hér á landi. Af Útnesveginum ók hann m.a. með okkur niður í Dritvík og niður að sjó á fleiri stöðum. Þetta voru örmjóir spottar og sneri svo við á smábletti sem var svo ótrúlega lítill að ég var eiginlega sannfærður um að hann mundi þurfa að bakka til baka. Nei hann bara sneri við sem ekkert væri. Það þótti gömlum meiraprófsmanni vel af sér vikið.

Þegar sagt var í fréttum Ríkissjónvarps (16.02.2013) var verðtryggingin væri ólögleg, var það ef til vill ekki mjög nákvæm fréttamennska. Ítarlegar var fjallað um málið í fréttum Stöðvar tvö rétt á undan. Þar var sagt að samkvæmt þeirri tilskipun ESB, sem hér um ræddi, væri verðtrygging neytendalána (upphæðir tilgreindar) ólögleg. Þessi tilskipun næði hinsvegar ekki til fasteignalána, en gæti hugsanlega náð til verðtryggðra bílalána eins og kom fram í umfjöllun Stöðvar tvö. Síðan hafa komið fram ýmis önnur sjónarmið í fréttum varðandi þetta flókna mál. Alls ekki virðist ljóst, enn sem komið er að minnsta kosti, hvort verðtryggingin er ólögleg og hvort hún gildi aðeins um neytendalán og hvað lán flokkast undir neytendalán? Þetta þarf að skýra betur.

Með fullum rétti má halda því fram að Ríkissjónvarpið stuðli að einangrunarhyggju og heimalningshugsunarhætti með því að sýna aldrei erlenda fréttaskýringaþætti eða annað efni um þróun mála í heiminum, pólitík og sögu.

Það er fín viðbót fyrir þá sem eru áskrifendur að Sjónvarpi Símans með norrænu stöðvunum að þar skuli færeyska sjónvarpið nú komið í hópinn. Gaman að því. Hef að vísu enn ekki getað horft mikið en þetta er góð viðbót. Færeyska sjónvarpið endursýnir mikið af efni úr danska sjónvarpinu, en þar er líka færeyskt efni. Takk fyrir það.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, – ESG

K segir í athugasemd við Molana: „Munntóbakið valdi hrinu krabbameina“. Þetta er fyrirsögn í Fréttabl. í gær (12.002.2013). Þú hefur fjallað um þessa nýju tegund fyrirsagna að undanförnu. – Það er rétt. Prófessor emerítus Helgi Haraldsson í Osló gerði góðlátlegt grín að svona fyrirsögnum í Molum nýlega og nefndi mörg dæmi, sum meinfyndin.

Hér kemur svo önnur sending frá Helga í Osló (13.02.2013): http://eyjan.pressan.is/frettir/2013/02/12/langthrad-lausn-i-kjaradeilu-landspitalans-og-hjukrunarfraedinga-uppsagnir-vaentanlega-dregnar-til-baka/

„Við sammældust um að greina ekki frá innihaldi samningsins opinberlega strax. Við viljum að hjúkrunarfræðingar og stjórnendur á spítalanum heyri innihald samningsins fyrst. ….,“ er haft eftir formanni Félags íslenskra hjúkrunarfræðinga á Fréttavef Morgunblaðsins í kvöld.”- Sammældust – urðu þá allir jafn langir?

Menn sammæltust líklega um þessa lengdarjöfnun.

Góðar stundir,- Helgi Haraldsson – Molaskrifari þakkar Helga sendinguna.

Þessi munur reyndist of stór til að brúa, sagði íþróttafréttamaður Ríkissjónvarps (13.02.2013). Betra hefði verið: Þetta bil reyndist of breitt til að brúa. Heitir ekki annað bindi æviminninga Halldórs E. Sigurðssonar fyrrum ráðherra: Bilin á að brúa? Það er m.a. tilvísun til Borgarfjarðarbrúarinnar, sem var umdeild á sínum tíma rétt eins og og Hvalfjarðargöngin síðar. Sýnir hve skammsýni ræður oft miklu í rifrildismálum samtímans.

Lesandi benti á fyrirsögn á mbl.is (13.02.2013): Umhverfisvá æfð í Hafnarfirði, og segir:“Ætli það sé nokkur hætta á að æfing þessi hafi snúist um viðbrögð manna við válegum atburðum fremur en að náttúran hafi æft ógnatilburði??“ Það kom reyndar fram í fréttinni að æfa ætti viðbrögð, en fyrirsögnin er kjánaleg.

Afar vel unnið innslag í Kastljósi (15.02.2013) hjá þeim Jóhannesi Kr. Kristjánssyni og Agli Eðvarðssyni um ótrúlega atburðarás og mistök á sjúkrahúsinu á Akranesi og baráttu móður fyrir réttlæti. Það er með ótrúlegt að embættismaður eins og landlæknir skuli komast upp með að segja það eitt ,,að gripið hafi verið til viðeigandi ráðstafana” í ljósi þess sem fram kom í þættinum.

Ótextaður fíflagangur með söngkonu í svokölluðum ,,Hraðfréttum” var hvorki fyndinn né aðstandendum til sóma.

Molaskrifari á ómögulegt með að gefa spurningaþættinum Gettu betur í Ríkissjónvarpinu (15.02.2013) háa einkunn. Þátturinn er flatur, spurningar óspennandi og hann nær sér aldrei á flug. Þarna þarf að breyta , – miklu. Spurningaþættir geta verið góð skemmtun, Útsvarið er það oft. Því er vel stjórnað. Þar að auki er þátturinn margsundurslitinn af auglýsingum. Framhaldsskólanemar eru margir mjög fróðir,nánast fjölfræðingar,  en í þættinum í gærkveldi voru áberandi gloppur í kunnáttu í landafræði og samtímasögu. Segir það okkur  eitthvað um skólakerfið?

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. En bréfritarar eru beðnir að taka fram hvort birta megi bréfin undir nafni, – ESG