Af dv.is (01.08.2012): Aðilarnir vistaðir í fangageymslu fyrir rannsókn máls, að því er fram kemur í upplýsingum frá lögreglu. Ekki að spyrja að þessum aðilum. Aldrei til friðs. Voru þetta ekki bara menn? Og voru þeir ekki vistaðir í fangageymslu vegna rannsóknar máls, ekki fyrir rannsókn máls?

Eruð þið með ykkar eigin gæda, var spurt í viðtali í morgunþætti Rásar tvö (01.08.2012). Er það ekki málstefna Ríkisútvarpsins að forðast slettur?. Hvað er að hinu ágæta orði leiðsögumaður? Sami spyrill spurði svo af snilld: Hvernig er fólkið í Grænlandi?

Rás tvö auglýsir verslunarmannahelgina sem stærstu ferðahelgi ársins. Fleiri nota þetta orðalag í auglýsingum. Væri ekki eðlilegra að tala um mestu ferðahelgi ársins? Molaskrifari hallast að því.

Lög um gjaldeyrisviðskipti er ætlað koma í veg fyrir að hægt sé að svindla á gjaldeyrishöftunum, sagði fréttamaður Stöðvar tvö (01.08.2012). Hann hefði átt að segja: Lögum um gjaldeyrisviðskipti er ætlað að koma í veg fyrir …

Þegar Molaskrifari vann á fréttastofu sjónvarpsins í áratug eða rúmlega það fyrir langa löngu  var það föst vinnureglu að segja í Neskaupstað, – ekki á Neskaupstað. Nú virðist það föst regla í Ríkisútvarpinu að segja á Neskaupstað. Séra Emil Björnsson fréttastjóri sagði jafnan: Við förum í kaupstað, ekki á kaupstað.

Hvað eru þessar rannsóknir að segja okkur, sagði fréttamaður Stöðvar tvö (01.08.2012). Hann átti við: Hverjar eru niðurstöður rannsóknanna?

Það var mikil tillitssemi sjónvarpsstöðvanna við forseta Íslands að sýna ekki margar yfirlitsmyndir frá Austurvelli er forsetinn var settur í embætti. Þar var nefnilega lítið fleira fólk en á venjulegum góðviðrisdegi.

Af mbl.is (01.08.2012): Bílstjóri umræddrar rútu hafði samband við lögregluna á Egilsstöðum … var honum veitt fararleyfi gegn því skilyrði að hann æki Breiðadalsheiðina, færi ekki austur firðina. Þótt Molaskrifari sé ekki mjög staðkunnugur eystra veit hann að Breiðadalsheiði er á Vestfjarðakjálkanum en fyrir austan er Breiðdalsheiði. Þá væri líklega eðlilegra hér að tala um að aka suður firðina, ekki austur.

Ekki er Molaskrifari sáttur við að kalla Hraundranga í Öxnadal fjall eins og gert var í morgunþætti Rásar tvö (02.08.2011). Hraundrangi er tindur eins og þeir sjá sem fara um Öxnadal. En kannski hefur sá sem þetta sagði aldrei farið um Öxnadal og er því vorkunn.

Fréttaritarar Ríkisútvarpsins erlendis eru öflugur bakhjarl fréttatímanna. Af handahófi nefnir Molaskrifari Svein Helgason vestra, Kristin R. Ólason í Madríd, Borgþór Arngrímsson í Kaupmannahöfn, Gísla Kristjánsson í Noregi og Sigrúnu Davíðsdóttur í Lundúnum. Hörkulið sem bætir fréttatímana.

 Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – . ESG