Molavin sendi eftirfarandi (13.04.2012) „Starfsmaður á veitingastaðnum skarst í lófa eftir að hafa afvopnað manninn, segir í frétt á visir.is. Trúlegra virðist að hann hafi skorizt ÞEGAR hann afvopnaði manninn. Hér er dæmigert hugsunarleysi á ferð við fréttaskrif. Þessi „eftir-árátta“ í fréttaskrifum er útbreidd. Iðulega sagt að menn hafi slasast eftir slys.” Molaskrifari þakkar sendinguna.

Í fréttum Ríkissjónvarps (12.05.2012) sagði fréttamaður:.. segir sjóðina hafa gengið miklu skemur, en . Síðan kom Helgi Hjörvar þingmaður á skjáinn og notaði sama orðalag. Molaskrifari er á því að hér hefði fremur átt að tala um að sjóðirnir hefðu gengið miklu skemmra en, ekki skemur en.

Úr fréttum Stöðvar tvö (13.05.2012): … heldur muni sjónin halda áfram að versna um aldur fram, sagði fréttamaður. Helst var að skilja af samhenginu að þá mundi sjónin halda áfram að versna þau ár sem viðkomandi ætti ólifuð. Annars var þetta eiginlega óskiljanlegt. Í sama fréttatíma var rætt við mann sem hafði prófað hinar ýmsustu leiðir.

Æ oftar heyrist í fréttum talað um að landa máli, þegar átt er við að leysa mál, finna lausn á einhverjum vanda (Fréttir Stöðvar tvö 14.05.2012). Ef til vill eru þetta áhrif frá íþróttafréttamönnum sem lengi hafa talað um að landa sigri, að sigra.

Í íþróttafréttum Ríkissjónvarps (14.05.2012) var sagt að stuðningsmenn sigurliðs í knattspyrnu væru á bleiku skýi! Hvaða kemur þetta bleika ský? Segjum við ekki á íslensku um þá sem eru himinlifandi yfir góðum árangri, góðu gengi, að þeir séu í sjöunda himni?

Fróðlegt er að lesa í Morgunblaðinu (15.05.2012) hvernig Reykjavíkurborg hefur staðið að náttúruspjöllum á Úlfarsfelli. Það var Reynir Traustason ritstjóri DV sem fyrstur mun hafa vakið athygli á þessum skemmdarverkum borgarinnar ,en nágranni kærði. Úlfarsfell er ein af náttúruperlum borgarsvæðisins. Tilfinningaleysi má ekki ráða í umgengni við slík verðmæti.

Stundarkorn hlustaði Molaskrifari á morgunþátt Útvarps Sögu að morgni þriðjudags (15.05.2012). Þar ræddi umsjónarmaður við Axel, einn af okkar mönnum í Svíþjóð eins og umsjónarmaður sagði. Annað eins endemisbull hefur Molaskrifari ekki heyrt lengi. Þarna voru rangfærslur og gervivísindi tvinnuð saman beinlínis að því er virtist til að skelfa fólk. Kerfisbundið væri verið að útrýma mannkyni til að fækka íbúum jarðar. Svíþjóðarmaðurinn hvatti svo hlustendur til að styðja konuna sem vill verða forseti en hún lýsti mikilli ánægju í beinni útsendingu sjónvarps þegar eggjum og ávöxtum var kastað í þingmenn við setningu Alþingis. – Mikið skelfing er þetta eitthvað sannfærandi, sagði umsjónarmaður morgunþáttarins að þessum lestri loknum ! Það ætti að varða við lög að dreifa svona rangfærslum og bulli. Þá er ekki verið að tala um ritskoðun heldur það að verja hlustendur, almenning fyrir háskalegu bulli og ósannindum.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – . ESG

Nú er mælirinn fullur, – og skekinn?

Frá því að Ólafur Ragnar Grímsson hóf kosningabaráttu sína svona rétt um messutíma á sunnudagsmorgni hafa dæmalausar yfirlýsingar gengið frá honum í allar áttir.

Hann hefur storkað formönnum stjórnmálaflokka, ríkisstjórn landsins og þingmönnum á þann hátt að algjörlega fordæmalaust er. Treystið þið þinginu betur? Þannig spurði hann á fundi í Grindavík. Af fréttinni á Stöð tvö varð ekki annnað skilið en hann væri að spyrja hvort fundarmenn treystu honum ekki betur en þjóðþinginu? Hvort hlutverk forseta ætti ekki að vera að verja þjóðina gegn þjóðþinginu? Enginn annar þjóðhöfðingi hefur látið sér slíkt og þvílíkt til hugar koma frá því einveldi lagðist af í Evrópu og einveldiskonungar hættu að trúa því að vald þeirra væri frá Guði komið. Heldur forseti Íslands kannski að svo sé um sig?

Eru foringjar íslenskra stjórnmálaflokka svo lítilla sanda og sæva að þeir láti allar þessar makalausu yfirlýsingar Ólafs Ragnars yfir sig ganga án þess að segja orð? Ætla ráðherrar og þingmenn að láta vaða svona yfir sig á skítugum skóm? Án þess að segja eitt einasta orð?

Ólafur Ragnar Grímsson hefur sagt það gott og gilt að forsetinn hafi eina stefnu í utanríkismálum og ríkisstjórnin aðra. Forsetinn er EKKI kosinn til að marka stefnu íslensku þjóðarinnar í utanríkismálum. Ríkisstjórnin mótar stefnu þjóðarinnar í utanríkismálum. Utanríkisráðherra túlkar og skýrir þá stefnu. Af hverju lætur þú Ólaf Ragnar misbjóða þér og okkur öllum með þessum hætti, ágæti vinur ,Össur Skarphéðinsson – athugasemdalaust? Hvor túlkar utanríkisstefnu íslensku þjóðarinnar á erlendum vettvangi – þú eða hann? Hvor ykkar á að gera þjóðum heims það ljóst – þú, að það sé ekki hans hlutverk, eða hann að það sé ekki þitt hlutverk. Dettur þér í hug, að nokkur þjóð geti haft tvær stefnur í utanríkismálum – annars vegar stefnu ríkisstjórnar og hins vegar stefnu forseta sem samkvæmt stjórnarskrá landsins hefur vægast sagt mjög takmarkað pólitískt hlutverk og nákvæmlega ekkert hlutverk í mótun utanríkisstefnu ? Hví sýnir þú og aðrir ráðherrar í ríkisstjórninni – já allir aðrir stjórnmálamenn – engin viðbrögð? Viljið þið hafa þetta svona – eða vogið þið ykkur ekki að segja það sem ykkur finnst?

Ólafur Ragnar Grímsson hefur líka sagt að það sé einboðið að setja lög um breytingar á lögum um stjórn fiskveiða í þjóðaratkvæðagreiðslu. Þetta segir hann ÁÐUR EN Alþíngi hefur lokið umfjöllun slíkra lagafrumvarpa og gert þau að lögum. Þetta er auðvitað fáheyrt og ekki í neinu samræmi við stjórnarskrá landsins. Á Alþingi Íslendinga að þurfa að semja við forseta Íslands um afgreiðslu mála? Það er auðvitað fordæmalaust og fáránlegt að þingmenn þurfi að starfa undir svona hótun frá forseta lýðveldisins. Ætlið þið að halda áfram að róa að því öllum árum að reyna að finna lausn á sjávarútvegsmálunum á Alþingi þegar þið nú vitið að forsetinn ætlar ekkert með þá niðurstöðu að gera? Þetta er nokkuð sem ég trúi ekki að nokkur maður hafi ímyndað sér að gæti gerst. Og þjóðkjörnir þingmenn bara þegja. Er pólitískt hugrekki hvergi að finna ?

Þessi forseti sem sitja vill nú að völdum í tuttugu ár, tólf árum lengur forseta Bandaríkjanna leyfist, hefur sagt að hann hafi áformað að skipa utanþingsstjórn þegar búsáhaldabyltingin stóð sem hæst – hafi haft nöfnin tilbúin. Ætlaði hann að reka löglega kjörna ríkisstjórnina frá völdum og skipa aðra sjálfur – af því að fólk var að lemja tunnur á Austurvelli? Hvernig ætlaði hann að gera þetta? Ætlaði hann að vísa í 15. grein stjórnarskrárinnar þar sem segir: ,,Forsetinn skipar ráðherra og veitir þeim lausn. Hann ákveður tölu þeirra og skiptir störfum með þeim”. Telur hann að þessi grein stjórnarskrárinnar veiti honum heimild til þess að skipa ríkisstjórn þegar honum hentar og tilnefna þá ráðherra, sem honum þóknast – þegar honum dettur það í hug? Það væri vissulega í samræmi við aðrar svokallaðar ,,lögskýringar” hans. Eigum við ekki þrjár lagadeildir við jafnmarga háskóla? Hafa þær enga skoðun á þessari „lögskýringu” forsetans? Hví þegja þar allir?

Það er skylda stjórnmálaforingja hvar í flokki sem þeir standa að spyrna fótum gegn ofríkinu sem nú er boðað frá Bessastöðum. Ég skora á formenn stjórnmálaflokkanna að láta þessum einstæða yfirgangi Ólafs Ragnars Grímssonar ekki ósvarað.

Formenn flokkanna á Alþingi eiga að taka höndum saman og ná samstöðu um breytingar á stjórnarskránni sem skýra valdsvið forsetans og afmarka þannig að þjóðin þurfi ekki að þola fleiri svona uppákomur. Og koma þannig í veg fyrir að einn maður geti tekið sér vald sem hann hefur ekki á ekki að hafa og má ekki hafa.

Viðbrögð og yfirlýsingar Ólafs Ragnars Grímssonar koma mér svo sem ekkert á óvart. Við þessu máttu menn búast. En að stofnanir samfélagsins svo sem þjóðþing og ríkisstjórn svo og fólkið, sem þar situr – ráðherrar og þingmenn – skuli láta manninn komast upp með að vaða elginn með þeim hætti sem hann nú gerir og draga þessar stofnanir og alla þá, sem þar starfa, niður í svaðið er meira en umhugsunarvert – það er hneykslunarefni. Þessa hættulegu þróun verður að stöðva. Það verður að gera með því að breyta stjórnarskránni.

Eiður Svanberg Guðnason.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – . ESG

Molavin sendi Molum þessa ágætu hugleiðingu og ábendingu (12.05.2012):

,,Málfræðikennsla hefur ekki verið fyrirferðarmikil í grunnskólum síðustu áratugi. Eitt af einkennum þess að börn, sem ekki hafa fengið viðhlítandi móðurmálskennslu í skólum, en er samt treyst fyrir því að vera fyrirmynd annarra, er hve mörgum hinna yngri í stétt fjölmiðlafólks lætur illa að skrifa boðlegan fréttatexta. Hér er dæmi úr fyrirsögn á frétt mbl.is laugardagsins: Eitt af hverjum tíu börnum fæðast fyrir tímann Hér er einfaldlega átt við að eitt barn fæðist fyrir tímann af hverjum tíu fæddum börnum, og hefði því átt að standa: ,,Eitt af hverjum tíu börnum fæðist fyrir tímann.“ Sleifarlag í skrifum af þessu tagi í fjölmiðli, sem hefur í næstum heila öld verið til fyrirmyndar um málfar og málnotkun, endurspeglar ekki aðeins slælega þekkingu á móðurmálinu, heldur líka óverðskuldað sjálfstraust, sem lýsir sér í því að ekki er leitað ráða né textinn lesinn yfir með gagnrýnum huga áður en hann er sendur úr tölvu blaðamanns inn í umbrotsforritið eða út á heimasíðuna”. Molaskrifari þakkar sendinguna. Þetta eru orð að sönnu.

Úr mbl.is (12.05.2012), fréttin er um mokafla Steinunnar SH: Fram kemur að báturinn hafi farið í fimm ferðir. Hér hefði farið betur á því að segja að báturinn hafi farið í fimm róðra.

Í vinsælum þætti um útivist og ferðalög í Ríkisútvarpinu (12.05.2012) var talað um stað í Reykjadal , ekki langt frá Hveragerði þar sem vinsælt væri að baða. Molaskrifari hallast að því að hér hefði frekar átt að segja: … þar sem vinsælt væri að baða sig. Fólk baðar sig en bændur baða sauðfé.

Á fréttavefnum visir.is birtir (1222.05.2012) verkefnisstjóri losunar gjaldeyrishafta Seðlabanka Íslands ábendingar vegna leiðara skrifara Fréttablaðsins. Þar segir meðal annars: ,,Rétt er að undirstrika að samkvæmt skilmálum fjárfestingarleiðarinnar er skýrt kveðið á um að til þess að geta tekið þátt í útboðum megi fjárfestir eða lögaðili þar sem hann á eða átti sæti í stjórn eða er eða var í forsvari fyrir, ekki hafa verið ákærður af handhafa ákæruvalds eða kærður til lögreglu af Seðlabankanum, og máli vegna þess sé enn ólokið hjá ákæruvaldi eða lögreglu, eða hafa vanefnt verulega óuppgerða stjórnvaldssekt eða sátt; allt vegna brota á lögum um gjaldeyrismál, nr. 87/1992, og reglum settum á grundvelli þeirra.” Þetta er bæði skýrt og ljóst, ekki satt. Greinin hefði haft gott af prófarkalestri fyrir birtingu.

http://www.visir.is/abendingar-vegna-leidara/article/2012705129951

Ágætum fréttamanni Ríkisútvarps varð það á (12.05.2012) að segja að maður hefði verið settur út úr sakramentinu. Líklega hefur þetta verið mismæli, en talað er um að setja einhvern út af sakramentinu , þegar einhverjum er skákað til hliðar eða hann sniðgenginn með mjög áberandi hætti, einhverjum er útskúfað.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – . ESG

Ólafur Ragnar Grímsson byrjar kosningabaráttu sína í drullupolli. Það er enginn andapollur. Í leiðara Fréttablaðsins segir í dag að Ólafur Ragnar ætli greinilega að ösla í gegnum pólitískan drullupoll í kosningabaráttu sinni. Hann byrjar á því að ráðast á með offorsi á maka eins frambjóðandans. Það er nýjung í kosningabaráttu á Íslandi. Hefur aldrei verið gert áður, svo ég viti og jafnan verið talið lítilmannlegt og merki um ódrengskap að blanda fjölskyldum frambjóðenda í pólitískan slag sem nú verður greinilega leðjuslagur. Ólafur Ragnar er búinn að sjá til þess. Hann gaf tóninn í gær. Ekki verður séð að sá sem Ólafur Ragnar réðist svo heiftarlega á mikið til saka unnið annað en kvonfangið, – sem er saknæmt að mati sitjandi forseta. Þetta er með ólíkindum.

Í viðtali við forsetann í mánudagsblaði DV stendur hann í hörku rifrildi við blaðamann DV. Ólafur Ragnar Grímsson er hræddur; hann er skíthræddur. Þess vegna eys hann nú skítnum á báða bóga.

Vonandi láta aðrir forsetaframbjóðendur þetta dæmalausa skítkast forsetans vind um eyru þjóta. Þeir eiga að leyfa honum að sitja einum í drullupollinum þar sem hann nú hefur komið sér fyrir. Ágætur maður sagði eitt sinn um Ólaf Ragnar: Ólafur Ragnar fer alltaf alveg að strikinu og svo fer hann yfir strikið. Nú er kominn yfir strikið og ofan í drullupollinn. Það fer ekkert illa á því.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – . ESG

„ … Bæjarbúar eiga annað skilið en að bæjarfulltrúar séu að berjast á banaspjótum um keisarans skegg.“ (dv.is 13.05.2012) Þetta er haft eftir bæjarstjóranum í Garðinum í tilefni þess að einn bæjarfulltrúi úr meiriluta Sjálfstæðisflokksins gekk til liðs við minnihlutann í bæjarstjórn. Þetta er líklega tilvitnun ársins. Ekki fleiri orð um það. Blaðamaðurinn sem fréttina skrifar hefur í fréttinni eftir bæjarstjóranum að þetta hafi komið eins og þruma úr heiðskýru lofti. Ætti að vera … úr heiðskíru lofti .

Lesandi vakti athygli á fyrirsögninni Eftirspurn eftir Bauhaus á dv.is og segir: í. „Staglstíllinn er ódrepandi. Aftur og aftur heyri ég íþróttafréttamenn tala um, að

einhver eða einhverjir, einstaklingar eða félagslið, hafi gersigrað mótið. Þó er ekki vitað til þess, að mótið sem slíkt hafi verið meðal keppenda. Harðsnúnasta liðið hafði hins vegar borið sigurorð af öðrum þátttakendum í mótinu.” Skrifari þakkar sendinguna.

Úr mbl.is (10.05.2012): … og hefur síðan 21 styrki verið úthlutað. Molaskrifari er á því að hér ætti að standa: … og hefur síðan 21 styrk verið úthlutað..

Sá ágæti fréttamaður Gissur Sigurðsson gerði góðlátlegt grín að Ólafi Ragnari Grímssyni forseta í morgunútvarpi Bylgjunnar (11.05.2012) Ólafur Ragnar er nefnilega enn einu sinni staddur í útlöndum að gera garðinn frægan. Nú er hann búinn að finna upp leið til að útrýma fíkniefnavandanum í veröldinni. Og hljóp enn einu sinni langt fram úr sjálfum sér þegar hann var að segja útlendingum frá afrekum sínum. Gissuri tókst vel upp er hann sagði frá þessu.

Slúður- og slettusúpa Rásar tvö var á sínum stað á föstudagsmorgni (11.05.2012). Dæmalaus er sá dómgreindarbrestur í Efstaleiti að ausa þessum subbuskap yfir nývaknað fólk. Meðal annars talaði óðamála pistlahöfundur þennan morgun um að skjóta. Við skutum í gær við skutum í dag og við skjótum á morgun, sagði hún efnislega og var að tala um myndatöku vegna auglýsingar. Dagskrárstjórum í Efstaleiti finnst þetta bull greinilega besta mál. Annars væri því ekki hellt yfir okkur vikulega.

Hversvegna (ef svo brýnt er að útvarpa þessu bulli) er konan ekki látin rausa í Virkum morgnum á Rás tvö. Þá væru ambögurnar og sletturnar alla vega ekki eins áberandi?

Forsetningin á með staðarnöfnum virðist vera í sókn. Hún er æ meira notuð í fréttum fjölmiðla. Í hádegisfréttum Ríkisútvarps (11.05.2012) var rætt við bóndann á Holti í Þistilfirði, eins og það orðað. Molaskrifari hefur aldrei heyrt aðra forsetningu en í með bæjarnafninu Holti hvort sem verið hefur á Suðurlandi eða Suðurnesjum. Kannski er sagt á Holti í Þistilfirðinum.

Molalesandi gerir barnamálið í Mogga að umtalsefni (14.05.2012) og segir: „Í hálkunni misstu einhverjir bíla sína utan í staura og vegvísa. En Morgunblaðið færir slíkar fréttir í barnamál og segir á netsíðu sinni: Einn bíll klessti á ljósastaur og annar á umferðarmerki.“

Lesandi sendi Molum þetta (11.05.2012): ,,Arekstur.is hvetur ökumenn og ekki síður hjólreiðafólk að vanda sig betur í umferðinni og sýna tillitssemi. Starfsmenn Árekstur.is segja að hjólreiðafólk sjáist oft á tíðum ekki vel í umferðinni og það eigi ekki heima á stofnbrautum þar sem hámarkshraði er mikill.” Molaskrifari þakkar sendinguna.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – . ESG