Við Íslendingar eru stillt og siðmenntuð þjóð og það er sú mynd sem við viljum viðhalda af okkur. Siðmenntun felur það meðal annars í sér að taka ábyrgð. Fylgifiskar ábyrgðarinnar eru meðal annars þeir að mynda sér skoðun um mikilvæg mál. Samfélagslegar aðstæður hafa þess vegna afgerandi áhrif á mynd siðprýðinnar. Sá sem vill telja sig til siðmenntaðs einstaklings þarf með öðrum orðum að bregðast við því sem er að eiga sér stað í kringum hann. Við lifum á furðulegum tímum þar sem samfélagið, sem meiri hluti okkar hélt að væri heilt, hefur verið rjúkandi rústir í að minnsta kosti fjögur undanfarin ár. Núverandi vanda má að stórum hluta rekja til þess hversu vel menn hafa rekist í hópum og til skorts á gagnrýninni umræðu, gagnsæi og heilbrigðu siðferði. Við þykjumst hins vegar vita að þeir eru þó nokkrir sem langar til að taka til hendinni við að byggja upp nýtt samfélag af því þeir eru meðvitaðir um að það er það sem þarf.

Samfélag sem gerir ráð fyrir öllum. Fámenn þjóð sem býr saman á stórri eyju þarf að byggja upp þjóðfélag sem gerir ráð fyrir öllum. Fámennið og vegalengdirnar gera það að verkum að við ráðum ekki við það að hér búi tvær þjóðir. Það er fámenn valda- og eignastétt sem nýtur rándýrra fríðinda sem skattborgararnir bera kostnaðinn af á sama tíma og stærstur hluti landsmanna upplifir síversnandi lífskjör í gegnum niðurskurð á velferðarkerfinu, minnkandi atvinnumöguleika og aðrar kjaraskerðingar. Eins og er stendur þjóðinni ógn af endurreisn þess kerfis sem olli því efnahagslega uppnámi sem er að grafa undan velferðarkerfinu og samfélaginu um leið. Samfélagið mun festast í eilífum vítahring eyðileggingar ef áfram verður haldið á þeirri braut að samþykkja sérhagsmuni umfram almannahagsmuni. Í stað núverandi endurreisnar þarf uppbyggingu reista á grunni lýðræðis og velferðar. Til að byggja upp betra samfélag þarf að læra af reynslunni og opna fyrir nýjar leiðir og lausnir.

Með samstilltu átaki er allt hægt. Þeir sem byggja íslenskt þjóðfélag eiga val um hvort þeir vilja heldur endurreisn þess kerfis sem tekur sérhagsmuni fámennrar eigna- og valdastéttar fram yfir almannahagsmuni eða uppbyggingu nýs samfélags sem byggir á jöfnuði, samvinnu og sjálfbærni. Grundvöllurinn að slíkum breytingum er samstaða þjóðarinnar. Með samstilltu átaki er nefnilega möguleiki á að snúa þeirri óheillaþróun við, sem er að eiga sér stað. Þeir sem stofnuðu stjórnmálaflokkinn SAMSTÖÐU – flokk lýðræðis og velferðar eiga sér þann draum að íslenskir kjósendur séu tilbúnir til að standa saman að uppbyggingu lýðræðislegs velferðarsamfélags sem hefur almannahag í forgrunni. Þeim sem eru tilbúnir til að leggja sitt af mörkum til að fullkomna þann draum er bent á að SAMSTAÐA er ákjósanlegur vettvangur fyrir alla sem vilja leggja því lið að gera hann að veruleika.

Höfundar:
Rakel Sigurgeirsdóttir, formaður SAMSTÖÐU-Reykjavík.
María Grétarsdóttir, gjaldkeri SAMSTÖÐU, flokks lýðræðis og velferðar.