Viðskiptafræðineminn Andrea Gylfadóttir býr ásamt unnusta sínum og tveimur börnum í rúmgóðu einbýlishúsi í Hnífsdal, en í bænum, sem tilheyrir Ísafjarðarbæ, búa um 250 manns.

Andrea Gylfadóttir Andrea tók eldhúsið sitt í gegn á einum mánuði og fékk meðal annars aðstoð frá tengdaforeldrum.

„Ég er reyndar uppalin á Ísafirði og þar kynntist ég manninum mínum sem er vélstjóri héðan úr Hnífsdal. Við keyptum húsið árið 2013, þegar ég var ólétt að fyrsta barninu mínu. Þá kostaði það undir tuttugu milljónum sem er auðvitað frekar fyndið miðað við hvað svona hús myndi kosta í Reykjavík.

Á síðasta ári ákváðum við að ráðast í að gera húsið upp. Byrjuðum á því að taka eitt baðherbergi í gegn og höfum gert húsið mikið upp að utan. Múruðum, máluðum og skiptum um einhverja glugga. Kári er mjög handlaginn og pabbi hans er smiður þannig að þetta gekk allt mjög vel fyrir sig enda höfðum við góða aðstoð.

Innréttingarnar í eldhúsinu voru upprunalegar en þetta var orðið þreytt og gamalt, reyndar ekki illa farið en bara úrelt. Svo langaði okkur að opna rýmið og láta birtuna flæða betur um. Einnig fannst okkur tilgangslaust að vera með afstúkaða borðstofu sem við myndum aldrei nota. Þannig að við ákváðum að opna bara í gegn og leyfa plássinu að njóta sín.

Allt rifið út Þau Andrea og Kári komu sér fyrir á neðri hæðinni meðan öllu var rúttað til. Tengdaforeldrar Andreu komu til aðstoðar en þau búa á Akureyri. Hér sjást Kári og Skarphéðinn vinna í því að taka niður vegginn sem skildi að eldhús og borðstofu.

Fyrst var farið í hugmyndavinnuna. Ég nota forrit á borð við Pinterest og Instagram mjög mikið í þessum efnum. Við höfðum alltaf skýrar hugmyndir um hvernig við vildum hafa þetta en þurftum aðstoð við útfærsluna. Baldur, sölumaður hjá HTH innréttingum, teiknaði þetta svo upp eftir okkar hugmyndum. Við sendum óteljandi tölvupóst fram og til baka þangað til niðurstaðan var komin á hreint og við komin með teikningar og mál sem við vorum 100% sátt við. Þetta tók í sjálfu sér ekki langan tíma og við fengum bæði góða og hraða þjónustu frá fyrirtækinu sem skiptir auðvitað öllu máli í svona framkvæmdum.

Fyrir Einn veggur farinn og byrjað á þeim næsta.

Við byrjuðum framkvæmdirnar 1. janúar. Kári var ekki á sjónum allan mánuðinn og við unnum frá morgni til kvölds. Settum upp litla aðstöðu á neðri hæðinni og rústuðum þeirri efri. Tengdaforeldrar mínir, Linda Steingrímsdóttir og Skarphéðinn Hjálmarsson, komu frá Akureyri og aðstoðuðu okkur við þetta. Fluttu bara inn. Svo var unnið á fullu. Við brutum niður tvo veggi og viðarskilrúmið og settum upp nýjan vegg þar sem ísskápurinn og ofnarnir eru núna. Svo var málað og parketlagt og svo framvegis þar til þetta var allt orðið fullkomið. Við erum afskaplega ánægð með útkomuna enda ekkert sem við hefðum viljað hafa öðruvísi við þessar breytingar,“ segir Andrea.

Bleikar rósir og blá Ísafjarðarbirta Innréttingin er sprautulökkuð með hálfmöttum glans og ljósin þjrú í loftinu koma frá IKEA. Gólfefnið er harðparket úr versluninni Parket og Gólf í Reykjavík.

Risastór eyja Barstólarnir koma úr versluninni Epal en þeir eru hannaðir af skandinavíska merkinu Hey. Í skúffunum við eyjuna geymir Andrea sitt lítið af hverju. Meðal annars dúka og föndurdót fyrir börnin.

Mynd: Andrea Gylfadóttir

Feluskápur í horni „Þarna eru hrærivélin, brauðristin, kaffivélin og öll hin tækin. Ég held að það séu sex innstungur þarna svo maður þarf ekki að færa neitt. Þetta var aðalkrafan hjá mér. Það varð að vera svona skápur. Þótt það sé fínt að geta lokað drasl þarna inni þá reyni ég að hafa fínt inni í honum líka.“

Mynd: Andrea Gylfadóttir

Borðstofan „Stólana pantaði ég frá Bretlandi og fékk þá senda heim. Þetta er miklu minna mál en maður heldur og margt í boði. Þetta getur verið ódýrara en er það ekki endilega alltaf. Fer eftir því hverju maður leitar að. Borðið er úr IKEA en dagatalið pantaði ég á etsy.com sem er alþjóðleg vefverslun með handverk. Ég held að konan sem gerði þetta sé frá Litháen.“

Mynd: Andrea Gylfadóttir

Bjart og blómlegt Veggurinn fyrir aftan ofnana var smíðaður í staðinn fyrir viðarskilrúmið. Eyjan, sem er 3,6 metra löng, er klædd með borðplötu frá Fantofell. Hún er úr plasti en með eikarútliti enda vildu þau ekki gegnheilan við. „Þetta þolir miklu meira og kallar ekki á eins mikið viðhald.“

Mynd: Andrea Gylfadóttir