Agnes ætlar að drekka kokteila í Keiluhöllinni og kenna zúmba í Kópavogi

Hvað ætlar þú að gera um helgina?

Bíður spennt eftir næst-fyrsta í jólum.
Agnes Wilde Bíður spennt eftir næst-fyrsta í jólum.
Mynd: DV ehf / Sigtryggur Ari

Föstudagur

„Þessa dagana er ég að vinna í því að setja upp leikrit með nemendum Kvennaskólans og undanfarið hef ég verið að taka áhugasama leikara í prufur fyrir þetta leikrit. Þar sem föstudagurinn er bara venjulegur vinnudagur fer hann að mestu í þetta en um kvöldið ætla ég að skella mér á eitthvert gott leikrit í borginni. Kannski Guð blessi Ísland sem ég hef heyrt marga tala nokkuð vel um,“ segir Agnes Wilde leikkona, zúmbakennari og leikstjóri.

Laugardagur

„Á morgun ætla ég svo að vakna snemma og mæta sem afleysingakennari hjá Reebook Fitness í Kópavogslaug. Ég er sem sagt búin að læra zúmbakennslu líka. Tíminn byrjar klukkan 11.10 og ég er alveg hrikalega spennt að byrja að kenna. Seinni part laugardags ætla ég að skella mér í Keiluhöllina með æskuvinum mínum úr Mosó. Við kynntumst í Gaggó Mos og vorum saman í Lúðrasveit Mosfellsbæjar svo það er mjög viðeigandi að hafa þennan endurfund í Keiluhöllinni sem er rétt hjá Mosó. Eftir keiluna fáum við okkur svo örugglega einhverja kokteila á barnum þarna í sveitinni.“

Sunnudagur

„Á sunnudaginn er næst-fyrsti í aðventu en sem yfirlýst jólabarn hef ég beðið mjög spennt eftir þessum degi í nokkrar vikur. Ég ætla að skreyta allt hátt og lágt heima hjá mér, búa til aðventukrans og gera eitthvað fleira jólalegt og skemmtilegt. Seinni partinn fer ég svo á skrifstofuna þar sem ég er að æfa jólaleikrit með Sigrúnu Harðardóttur, vinkonu minni. Við ætlum að heimsækja leikskóla og jólaböll um allt Stór-Reykjavíkursvæðið í desember og sýna krúttlega jólaleikritið Týndu jólin með Þorra og Þuru. Þetta verður sem sagt bara lífleg og skemmtileg helgi hjá mér,“ segir Agnes.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.