Það fer fram stórleikur á morgun er Manchester United heimsækir Tottenham í ensku úrvalsdeildinni.
Þar mætast þeir Ole Gunnar Solskjær, stjóri United og Mauricio Pochettino, stjóri Tottenham.
Pochettino kannast auðvitað við Solskjær og sá hann skora sigurmark Meistaradeildarinnar árið 1999.
United kom þá ótrúlega til baka í úrslitaleik gegn Bayern Munchen og var Pochettino staddur á vellinum er leikurinn fór fram.
,,Ég var þarna með Toni [Jimenez, markmannsþjálfara Tottenham], það var frábært að horfa á þennan leik sem hlutlaus áhorfandi,“ sagði Pochettino.
,,Hvernig ég öskraði á eftir marki Manchester United var ótrúlegt. Eftir 90 mínútur skoraði Teddy Sheringham og Peter Schmeichel hafði gert sér leið í vítateiginn.“
,,Við sögðum bara: ‘Vá, þvílíkur leikur og nú er uppbótartími’. Svo skoraði Solskjær og við vorum að öskra og fagna. Ég veit ekki af hverju því við vorum hlutlausir.“
,,Andrúmsloftið var frábært. Nú er það tilviljun að við séum að hittast 20 árum seinna.“