Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Gestur þáttarins að þessu sinni er Arnar Grétarsson er áhugaverður karakter sem náði langt í knattspyrnu, hann var ungur að árum farinn að vekja áhuga stórliða en vildi ljúka námi.
Arnar ræddi aðeins fyrrum framherjann Marel Baldvinsson en þeir voru saman hjá Lokeren í Belgíu á sínum tíma.
Marel kom til Lokeren frá Stabæk í Noregi árið 2002 og var hjá félaginu til ársins 2006 en skoraði aðeins sex deildarmörk.
Arnar segir að Marel hafi alltaf haft mikla hæfileika en skilur ekki hvernig hann stóðst læknisskoðun hjá félaginu.
Marel var lengi að glíma við erfið hnémeiðsli en hann lagði skóna á hilluna árið 2010 aðeins þrítugur að aldri.
,,Fyrst til að byrja með eru þetta ég, Arnar Viðarsson, Rúnar Kristinsson og Auðun Helgason,“ sagði Arnar.
,,Auðun fer svo eftir einhvern tíma og Marel Baldvinsson kemur inn. Hann meiðist en Malli er eins og margir ekki vita, hann hefur verið með ónýtt hné í langan tíma og harkaði það af sér.“
,,Þegar hann kemur til okkar þá er með ólíkindum að hann hafi komist í gegnum læknisskoðun með handónýtt hné.“
,,Hann harkar af sér í mjög langan tíma. Hann var kannski á 50% eða eitthvað svoleiðis, hann gat ekki sparkað með vinstri.“
,,Ef hann hefði verið eðlilegur, ekki meiddur þá hefði hann getað náð gríðarlega langt.“
