Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Gestur þáttarins að þessu sinni er Arnar Gunnlaugsson sem er einn af merkilegri knattspyrnumönnum sem Ísland hefur átt, hann var undrabarn. Arnar á tvíburabróðir, Bjarka Gunnlaugsson sem einnig náði í fremstu röð í fótboltanum.
Arnar upplifði erfiða tíma á ferlinum eins og flestir knattspyrnumenn en hann meiddist til að mynda illa hjá Sochaux í Frakklandi.
Hann fór á endanum heim til Íslands í annað sinn og spilaði tvo leiki með uppeldisfélagi sínu ÍA.
Honum var svo fljótlega boðið að semja við lið Bolton á Englandi en var sjálfur hræddur við þá áskorun og vildi ekki fara.
Það var pabbi Arnars sem í raun rak hann út til Bolton þar sem hann spilaði frá 1997 til 1999.
,,Ég lét rifta samningi mínum eftir eitt og hálft ár. Ég var með þriggja og hálfs árs samning og lét rifta honum,“ sagði Arnar.
,,Ég kem til Íslands og spila einhverja tvo leiki. Ég var bugaður á líkama og sál og var bara: ‘Fokk!’
,,Það voru nokkrir læknar sem sögðu að ferillinn væri búinn og eitthvað kjaftæði. Ég kem heim til Íslands og fannst ég ekki vera í neinu sérstöku standi.“
,,Fyrsti leikurinn var gegn KR og við töpuðum 4 eða 5-0 og maður hugsaði bara hvað væri í gangi.“
,,Svo hringir held ég, Kenny Moyes, bróðir David Moyes sem var umboðsmaður. Hann hringir fyrir hönd Colin Todd hjá Bolton.“
,,Hann býður mér á æfingar í tvær vikur. Ég ætlaði ekki að fara, ég þorði ekki að fara.“
,,Það var þá sem pabbi rak mig: ‘Hættu nú þessu væli og drullaðu þér út!’ Mér fannst ég vera í svo lélegu standi, Bolton var nýkomið í ensku úrvalsdeildina og ég hugsaði að ég hefði ekkert þarna að gera.“
,,Ég kem á fyrstu æfinguna og sem betur fer voru Bretarnir ekki mjög professional á þeim tíma, þeir eyddu sumarfríinu á barnum og voru drekkandi og mættu ekki alveg in shape!
,,Miðað við þá þá var ég í þokkalegu standi og knattspyrnuhæfileika séð var ég í góðum málum og Colin Todd bauð mér samning eftir 2-3 æfingar.“