Breiðbablik mun á allra næstu dögum verða fyrir annari blóðtöku en bakvörðurinn, Davíð Kristján Ólafsson er að skrifa undir hjá Álasund í Noregi. Þetta herma mjög öruggar heimildir 433.is.
Davíð hélt utan til Noregs í vikunni og mun skrifa undir samning við félagið ef ekkert óvænt gerist. Félögin hafa náð samkomulagi um kaupverðið.
Davíð hefur verið einn öflugasti bakvörður Pepsi deildarinnar síðustu ár. Hann fór á reynslu til Álasunds fyrr í vetur og heillaði forráðamenn félagsins.
Álasund leikur í næst efstu deild Noregs en liðið var mjög nálægt því að fara upp á síðustu leiktíð. Með félaginu leika Hólmbert Aron Friðjónsson, Aron Elís Þrándarson og Daníel Leó Grétarsson.
Davíð er fæddur árið 1995 en hann hefur spilað 100 leiki í deild og bikar á Íslandi. Hann hefur alla tíð spilað fyrir Breiðablik.
Davíð lék sinn fyrsta A-landsleik í upphafi árs en hann hefur spilað fyrir yngri landslið Íslands.
Á sínum yngri árum var Davíð liðtækur í fimleikum en ákvað í seinni tíð að snúa sér að fullu að fótboltanum, það hefur reynst gæfuspor.
Blikar hafa misst marga sterka leikmenn í vetur en í vikunni var greint frá því að Willum Þór Willumsson væri að ganga í raðir BATE í Hvíta-Rússlandi. Þá var Gísli Eyjólfsson lánaður til Mjallby í Svíþjóð.
Ólíklegt er að Oliver Sigurjónsson snúi aftur en hann var á láni hjá Blikum á síðustu leiktíð. Þá var Arnþór Ari Atlason seldur til HK á dögunum.
