Angel Di Maria, leikmaður Paris Saint-Germain, mætti aftur á Old Trafford í gær er hans lið spilaði við Manchester United.
Di Maria lék með United í eitt tímabil frá 2014 til 2015 en náði sér ekki á strik á Englandi.
Hann fékk ekki frábærar móttökur í Manchester í gær og heyrðist baul í hvert skipti sem hann snerti boltann. Argentínumaðurinn naut þess því mikið þegar Presnel Kimpembe kom gestunum frá Frakklandi yfir.
Di Maria ögraði stuðningsmönnum heimaliðsins í kjölfarið og mátti sjá hann öskra: ,,Farið til fjandans“.
Í leiknum var einnig bjórflösku kastað í Di Maria sem tók flöskuna og gerði grín að stuðningsmönnum United með því að taka einn sopa.
Hann hefur notið þess að spila í gær en PSG hafði betur í leiknum með tveimur mörkum gegn engu.
Nú er hins vegar greint frá því að Di Maria gæti fengið bann fyrir þessa hegðun sína og er sagt að UEFA sé með málið á sínu borði.
