„Ég verði frá keppni í einhverjar vikur en það er erfitt að segja nákvæmlega hversu lengi,“ sagði landsliðsmaðurinn Alfreð Finnbogason í samtali við mbl.is.
Greint var frá því dag að Alfreð væri meiddur en hann meiddist á kálfa um síðustu helgi.
Meiðslin í kálfa voru einnig að plaga Alfreð í upphafi tímabils og missti hann þá af nokkrum leikjum.
Mbl.is segir að Alfreð sé í kapphlaupi við tímann að ná landsleikjum Íslands um miðjan mars, þá er liðið að hefja undankeppni EM 2020. Liðið leikur þá við Andorra og Frakkland.
Ótrúleg meiðsli hafa herjað á leikmannahóp liðsins eftir að Erik Hamren tók við, afar líklegt er að Emil Hallfreðsson verði fjarverandi í verkefninu. Emil hefur ekki spilað síðustu mánuði og er án félags eftir að hann rifti samningi sínum við Frosinone á Ítalíu.
Emil er í endurhæfingu á Íslandi og er ólíklegt að hann verði kominn á fullt eftir mánuð. Jóhann Berg Guðmundsson hefur mikið verið meiddur á þessu ári með Burnley, hann er frá þessa dagana vegna meiðsla í kálfa.
Staða landsliðsmanna er því ekkert sérstök en sem dæmi hafa markverðir liðsins, Rúnar Alex Rúnarsson og Hannes Þór Halldórsson mátt þola bekkjarsetu. Eru ekki í leikæfingu, þá er Birkir Már Sævarsson á undirbúningstímabili með Val.
