Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Gestur þáttarins að þessu sinni er fyrrum landsliðsmaðurinn og atvinnumaðurinn Bjarni Guðjónsson.
Bjarni er þekktastur fyrir tíma sinn hjá Stoke City þar sem hann lék á meðal annars undir stjórn Tony Pulis.
Pulis hefur víða komið við á þjálfaraferlinum en hann stýrir í dag liði Middlesbrough í næst efstu deild.
Bjarni lýsir samskiptum sínum við þennan litríka þjálfara sem spilar alls ekki fallegasta fótboltann.
,,Það er mjög sérstakt. Ég held að enginn maður hafi knúsað mig jafn oft og Pulis,“ sagði Bjarni.
,,Hann er með ofboðslega skýra sýn. Hún er ekkert sú fallegasta en hún er árangursrík og hann treystir á hana.“
,,Grunnurinn er bara að fá ekki á sig mörk og einfalda allan leik en það er ofboðslega gaman þegar þú veist hvað þjálfarinn vill.“
,,Þú veist að markmiðin eru skýr, það á bara að gera þetta svona. Það er ekkert þetta eða hitt, það er bara hans leið.“
,,Það var yfirleitt byrjað að drilla áður en þú hitaðir upp og svo var aftur farið í það. Þetta voru oft mjög langar æfingar.“
,,Þeir sem tóku eftir og hlustuðu vissu til hvers var ætlast og ég efast um að hann hafi fallið.“
Það er oft talað um Pulis sem manninn sem þolir ekki Íslendinga en hann hefur þjálfað þá ófáa í gegnum tíðina.
Bjarni er einn af fáum sem kannski líkar vel við Pulis en þeir eru enn í sambandi í dag.
,,Hann var ekkert svakalega mikið fyrir það að nota okkur. Hann er með Stoke þegar ég fer úr Stoke og var í Plymouth þegar ég fer úr Plymouth.“
,,Hann er einn af fáum þjálfurum sem ég er enn í sambandi við. Þetta var svona love/hate samband okkar á milli.“
,,Hann fýlar bara ákveðna leikmenn, hann vill hafa þá stóra, að þeir geti hlaupið hratt og kastað langt!“
,,Ég er ekki stór, það hafði hægst aðeins á mér og ég kann ekki að taka löng innköst!“