Matthías Örn Friðriksson sem staðið hefur vaktina í vörn Grindavíkur síðustu ár, er hættur í fótbolta. Hann greinir frá þessu á Facebook.

Matthías er 32 ára gamall en hann hefur spilað með Grindavík frá árinu 2010.

Hann lék 16 leiki í Pepsi deildinni í sumar og hefur átt stóran þátt í að koma Grindavík aftur í fremstu röð.

,,Fótbolti hefur alltaf verið stór partur af mínu lífi en eftir síðasta ár hefur metnaðurinn og áhuginn farið minnkandi og því tími kominn til að einbeita sér að öðrum hlutum,“ skrifar Matthías á Facebook.

Matthías er öflugur pílukastari og hefur verið einn af þeim sem hefur kveikt áhuga Íslendinga á þessari skemmtilegu íþrótt.

,,Takkaskórnir eru því komnir uppá hilluna í bili en ég óska Grindavík alls hins besta í sumar. Nú verður fókusinn settur á fjölskylduna og svo auðvitað stefnt á heimsmeistaratitilinn í pílukasti.“