Geir Þorsteinsson hefur tilkynnt framboð sitt til formanns KSÍ en kosið verður um formann þann 9 febrúar. Geir hefur verið í burtu frá KSÍ í tvö ár.
Hann ætlaði sér í framboð fyrir tveimur árum en steig til hliðar þegar Guðni Bergsson og Björn Einarsson börðust um stólinn. Guðni hafði betur en nú vill Geir fá starfið aftur.
Geir starfaði í mörg ár fyrir KSÍ, fyrst sem framkvæmdarstjóri og síðar formaður. Hann segir í viðtali við Fréttablaðið að breyta þurfi því hvernig sambandið stjórnar.
„Tíminn í burtu var nauðsynlegur. Minn þankagangur hefði aldrei farið þessa leið hefði ég verið í þessu daglega róti. Þetta er ekkert nýtt. Þetta fyrirkomulag hefur verið lengi við lýði á Norðurlöndunum en við höfum staðið í stað. En við höfum stækkað svo mikið að við þurfum að breyta fyrirkomulaginu,“ sagði Geir við Fréttablaðið.
„Vandamálið með íþróttir á Íslandi er að mörgu leyti að þeim er stjórnað með áratugagömlum aðferðum. Flestar breytingar sem hafa verið gerðar á íslenskri knattspyrnu hef ég komið að og leitt.
Geir segir að erlendis að þar hrífist allir af því starfi sem hann vann fyrir knattspyrnusambandið. Hann kvðeðst sigurviss.
,,Það er eins og sagt er við mig erlendis, en ekki kannski hér á landi, að það sem íslensk knattspyrna gerði undir minni stjórn það var einsdæmi í heiminum. Ég mun reyna að gera þetta af sama krafti og myndugleik og síðast.“
„Ég er alltaf sigurviss. Mér finnst við alltaf geta unnið þegar við förum í landsleiki. Þetta er eitthvað í mínum karakter; ég tel alltaf möguleika á sigri.“