Landsliðsmaðurinn Jóhann Berg Guðmundsson getur í raun verið þakklátur fyrir að geta spilað fótbolta og að hann sé með fulla sjón. Þegar Jóhann var á táningsaldri þá var hann að fikta með flugelda. Eitthvað sem hann segir að sé afar heimskulegt og biðlar til fólks að sleppa því að gera slíkt.
Jóhann var á táningsaldri þegar hann og Skarphéðinn Njálsson, æskuvinur hans voru að taka í sundur skottertu sem hét Víti, þeir voru svo að fikta með púðrið og kveikja í því þegar allt fór fjandans til.
Sprengjan sprakk í andlit Jóhanns sem brann illa, hann var heppinn að sjón hans skertist ekkert. Hann brenndist illa í andliti, öll hár á andliti hans brunnu og hárið á hausnum var illa leikið.
,,Ég var að fikta með einhverja Vítis-sprengju, ég og félagi minn Skarphéðinn vorum að taka hana í sundur, eitthvað sem þú átt ekki að vera að gera og kveikja í púðrinu,“ sagði Jóhann í hlaðvarpsþættinum 90 mínútur sem Hörður Snævar Jónsson stýrir.
,,Ég stóð yfir þessu og það kviknar strax í og beint upp í andlitið á mér. Ég er heppinn í dag, ég fór upp á spítala. Það var einhver snjókoma og ég þurfti að kæla þetta strax og var kominn með andlitið ofan í skaflinn, að reyna að bjarga þessu.“
Jóhann er þakklátur fyrir að ekkert hafi gerst fyrir augun á honum, hefði slíkt gerst er ólíklegt að hann væri á þriðja ári sínu í bestu knattspyrnudeild í heimi, ensku úrvalsdeildinni.
,,Peysan var öll farin og hárið var sviðið. Í dag er ég ótrúlega heppinn að þetta hafi ekki farið í augun á mér, eða að ég sé með ör og allan pakkann. Ég er gríðarlega þakklátur fyrir það.“
,,Ég fór til systur minnar fyrst, hún var að passa í næsta húsi, ég hélt að ég gæti reddað þessu eitthvað en andlitið á mér var bara í tómu tjóni. Hún sagði að við þyrftum bara að fara til mömmu og pabba og ég fór upp á spítala,“ sagði Jóhann en ferðin á spítalann er eftirminnileg. ,,Ég var með hausinn út um gluggann allan tímann til að kæla á mér andlitið.“
,,Eftir á þá reddaðist allt en maður á ekki að vera að taka flugelda í sundur, það er alveg ljóst.“
Þáttinn má heyra í heild hér að neðan.