Samkvæmt heimildum Fréttablaðsins hefur Hannes Þór Halldórsson, landsliðsmarkvörður samþykkt tilboð Vals og kaus hann að semja við ríkjandi Íslandsmeistara frekar en KR. Samkvæmt sömu heimildum eru Valsmenn tilbúnir að bjóða Hannesi talsvert betri kjör en KR gat boðið.
„Það er ekki komið svo langt að Hannes sé að semja við Val. Hans staða gæti breyst á næstu dögum og mánuðum, það er áhugi frá Svíþjóð, Noregi og fleiri löndum en hann er samningsbundinn Qarabag í átján mánuði í viðbót og það er talsvert sem þarf að gerast til þess að hann fái að fara,“ sagði Ólafur Garðarson umboðsmaður Hannesar við Fréttablaðið.
Hannes er á mála hjá Qarabag í Aserbaídsjan en þar hefur hann spilað minna en ráð var gert fyrir.
Hannes hefur því verið að skoða sína mál og ef marka má frétt Fréttablaðsins, þá er hann á heimleið í Pepsi deildina.
Hannes varð Íslandsmeistari með KR áður en hann fór í atvinnumennsku. Hannes hefur verið einn mikilvægasti leikmaður íslenska landsliðsins síðustu ár, hann varði mark liðsins á EM og á HM.
Valur hefur unnið Pepsi deildina síðustu tvö tímabil og hefur styrkt leikmannahóp sinn vel í vetur. Ljóst er að koma Hannesar er hvalreki.
Fyrir er Valur með Anton Ara Einarsson sem var einn besti markvörður deildarinnar sumarið 2017.