Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Gestur þáttarins að þessu sinni er Hólmar Örn Eyjólfsson, landsliðsmaður Íslands í knattspyrnu hefur átt merkilegan feril þrátt fyrir ungan aldur.
Hólmar er eins og margir vita sonur Eyjólfs Sverrissonar sem var atvinnumaður og landsliðsmaður á sínum tíma.
Hólmar segir að hann hafi ekki verið neitt undrabarn á yngri árum og fann þá ekki fyrir mikilli pressu frá föður sínum að feta í hans spor.
,,Það setti mann bara í það strax að maður ætli að að verða atvinnumaður. Ég var eiginlega bara frekar lélegur leikmaður þangað til ég varð 12,13 eða 14 ára,“ sagði Hólmar.
,,Ég sagði alltaf að ég ætlaði að vera atvinnumaður en það var ekki neitt sem benti til þess sko.“
,,Maður fann aðeins fyrir því en það var ekkert engin sérmeðferð eða eitthvað svona.“
,,Ég hef ekki fundið fyrir pressunni en ég skil hvaðan menn koma þegar þeir segja þetta. Persónulega hef ég ekki fundið fyrir því nema kannski þegar hann var líka þjálfari minn.“
,,Þá var enginn samanburður heldur bara tengslin sem voru erfið en bara það að hann sé pabbi minn hef ég ekki fundið fyrir.“
,,Það var engin pressa frá honum og ekki neinum. Örugglega meira frá mömmu, hún var að pressa á mig að gera það sem ég ætlaði að gera vel og ég var búinn að gefa það út að ég ætlaði að verða fótboltamaður. Hún sagði að við gætum alveg reynt það!“
,,Hún ýtti manni áfram að gera það þá almennilega, að gera alvöru atlögu að þessu.“