Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Gestur þáttarins að þessu sinni er Rúnar Kristinsson, leikjahæsti landsliðsmaður í sögu Íslands.
Rúnar lagði skóna á hilluna árið 2007 og tók svo fljótt að sér starf sem yfirmaður knattspyrnumála hjá KR.
Það var aldrei efst á listanum hjá honum að gerast þjálfari en hann tók svo við KR árið 2010 eftir að Logi Ólafsson var rekinn.
Rúnar ætlaði að taka sér hvíld eftir að skórnir fóru á hilluna en var fljótt farin að sakna þess að vinna í boltanum.
,,Ég fór strax og tók þessi námskeið og hugsaði með mér að það væri gott að hafa þetta ef maður myndi asnast til að fara út í þessa þjálfun,“ sagði Rúnar.
,,Ég var orðinn þreyttur þegar ég hætti og vildi prófa eitthvað allt annað en að vera í fótbolta. Ég hélt að það væri einhver lausn að fara gera eitthvað allt annað.“
,,Að mæta bara í vinnuna á morgnanna og vera búinn klukkan fjögur. Það tók mig 2-3 mánuði að átta mig á því að það var ekki neitt fyrir mig.“
,,Svo bauðst mér draumastarfið hjá KR að gerast yfirmaður knattspyrnumála, KR bjó til það starf.“
,,Sigursteini Gíslasyni var boðið það starf fyrst en Steini vinur okkar vildi vera þjálfari og vildi ekki taka starfið og þeir fóru að hugsa málið. Sem betur fer kom nafnið mitt einhvers staðar upp.“
,,Um leið og ég fékk það þá var engin spurning um að þetta væri það sem mig langaði að gera. Ég lærði ofboðslega mikið og átti fín ár sem yfirmaður knattspyrnumála hjá KR áður en ég fer að þjálfa.“
Meira:
Stjörnuprýtt lið Liverpool vildi fá Rúnar: ,,Þá ákvað ég að ég vildi ekki fara þangað“
Eigandinn var með ranghugmyndir:,,Einráður, á fullt af peningum og er með metnað“