Það er venjan að atvinnumenn í knattspyrnu leggi skóna 30-40 ára gamlir þó að markmenn eigi það til að spila lengur.

Það á ekki við um japanska framherjan Kazuyoshi Miura sem spilar með Yokohama FC í Japan.

Miura hefur átt mjög skrautlegan feril og lék á meðal annars fyrir ítalska liðið Genoa árið 1993.

Atvinnumannaferill hans hófst árið 1986 en hann spilaði þá með brasilíska liðinu Santos.

Hann hefur komið víða við á ferlinum en hefur spilað með Yokohama síðan 2005. Liðið leikur í næst efstu deild í Japan.

Miura skrifaði í dag undir nýjan eins árs langan samning við Yokohama sem er ansi merkilegt.

Ástæðan er sú að Miura fagnar 52 ára afmæli sínu í febrúar en er þrátt fyrir það enn á fullu í atvinnumennsku.

Miura var magnaður landsliðsmaður fyrir Japan frá 1990 til 2000 og skoraði 55 landsliðsmörk í 89 leikjum.