Angel Di Maria, leikmaður Paris Saint-Germain, hefur opnað sig um tíma sinn hjá Manchester United.
Di Maria var hjá United tímabilið 2014/2015 en stoppaði stutt hjá félaginu og var fljótt farinn til Frakklands.
Hann kennir Louis van Gaal, fyrrum stjóra United, um hvernig gekk á Old Trafford.
,,Ég var hjá Manchester United og allt var í fínu lagi með Van Gaal fyrstu tvo mánuðina,“ sagði Di Maria.
,,Eftir eitt rifrildi þá var sambandið ekki eins. Sambandið var aldrei eins eftir það.“
,,Við rifumst vegna þess að Van Gaal var alltaf að sýna mér slæma og neikvæðia hluti sem hélt aftur af mér.“
,,Einn daginn sagði ég við hann að mig langaði ekki að sjá þessa hluti og spurði hann af hverju hann gæti ekki sýnt mér jákvæða hluti.“
,,Honum líkaði ekki við hvernig ég talaði við hann og eftir það þá byrjuðu vandamálin.“