Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Gestur þáttarins að þessu sinni er Arnar Gunnlaugsson sem er einn af merkilegri knattspyrnumönnum sem Ísland hefur átt, hann var undrabarn. Arnar á tvíburabróðir, Bjarka Gunnlaugsson sem einnig náði í fremstu röð í fótboltanum.

Arnar er einn af nokkrum Íslendingum sem hafa reynt fyrir sér í ensku úrvalsdeildinni.

Arnar lék með Bolton í úrvalsdeildinni tímabilið 1997 til 1998 og lék þá 15 leiki fyrir liðið í efstu deild.

Arnari tókst ekki að skora mark í deildinni það tímabil en var svo frábær í Championship-deildinni tímabili seinna og var keyptur til Leicester.

Sjálfstraust Arnars var ekki mikið er hann samdi við Bolton en hann hafði upplifað erfiða tíma hjá Sochaux í Frakklandi.

Eftir að hafa stoppað stutt hjá ÍA hér heima þá ákvað Colin Todd, stjóri Bolton, að taka sénsinn og fékk Arnar til félagsins í úrvalsdeildinni sem var rosalegt stökk.

,,Það gerðist eitthvað á næstu tveimur vikum, á undirbúningstímabilinu. Ég fann það að ég væri komin heim, þetta var mitt level, enska úrvalsdeildin,“ sagði Arnar.

,,Við spiluðum æfingaleik og ég var strax kominn í liðið og það gekk vel. Ég fann að stuðningsmenn voru bara: ‘Hver er þessi gaur?’

,,Ég fann að þeir tóku mjög fljótt við mér og þá var ekkert aftur snúið. Svo byrjar úrvalsdeildin og ég kem inná í leikjum og er farinn að spila gegn Arsenal, Aston Villa, Stan Collymore, Gareth Southgate. Ég fann það bara að ég væri jafn góður og þessir gaurar.“

,,Ég var kominn í gott form og þetta tímabil var geðveikt fyrir mig. Þrátt fyrir að ég hafi byrjað þrjá leiki þá spilaði ég mikið, ég var alltaf fyrsti varamaður inn.“

,,Ég fann það að þegar leið á leikinn þá voru áhorfendur farnir að kalla og umfjöllun í blöðunum af hverju ég spilaði ekki meira.“

,,Það var samt hárrétt sem Colin Todd gerði, hann þekkti mína sögu í Frakklandi og var hægt og rólega að byggja mig upp.“

Arnar segir að Todd hafi gert mikið fyrir sig og kenndi sér á meðal annars mikilvæga lexíu sem borgaði sig.

,,Colin Todd kenndi mér eina mjög mikilvæga lexíu. Ég átti það til að yfirspila og klappaði boltanum of mikið og ég gerði það á röngum stað á vellinum.“

,,Hann sagði mér að fara ofar á völlinn og gera það á síðasta þriðjungnum. Hann sagði mér að vera meira effective. Það eru fullt af leikmönnum sem eru með eintóm skæri á miðju vallarins, hvaða gagn gerir það?“

,,Ertu að leggja upp mörk eða ertu að skora mörk? Nei, ókei þá ertu ekki tía eða nía. Hann kenndi mér það svolítið.“