Pistill er skoðun höfundar:
Það er sorglegt að fylgjast með því hvernig komið er fyrir hinu sögufræga félagi, Fram í fótbolta. Félagið er stefnulaust, stjórnlaust og margar rangar ákvarðanir á síðustu árum virðast vera að drepa félagið.
Þegar ég var ungur drengur var maður alinn upp við það að fjögur stórveldi væru í íslenskri knattspyrnu, KR, Valur, ÍA og Fram. FH hefur komið inn í þá mynd eftir að ég fór að eldast og er orðið leiðandi í íslenskum fótbolta.
Fram varð bikarmeistari sumarið 2013, þá var hins vegar byrjað að halla undan fæti. Segja má að síðan Þorvaldur Örlygsson sagði upp störfum hjá félaginu í júní 2013, þá hafi allt farið í skrúfuna.
Nokkrir Framarar sem ég hef rætt við í sumar hafa bent á það að, útfararstjórinn, Sverrir Einarsson hafi tekið sem formaður Fram sumarið 2013. Þar hafi vandræðin byrjað, félaginu hafi verið illa komið í höndum hans. Hann hafi tekið margar vondar ákvarðanir sem hafa reynst félaginu erfiðar.
Fram féll úr efstu deild karla árið 2014 og hefur ekki komið þangað síðan, Þá er félagið með sameiginlegt lið með Aftureldingu í meistaraflokki kvenna, það lið leikur einnig í næst efstu deild.
Síðan þá hafa þjálfarar, komið og farið. Leikmannaveltan verið meiri en góðu hófi gegnir og félagið er stjórnlaust og stefnulaust. Stjórnir hafa nánast sprungið oftar en stigin hafa verið á töflunni síðustu ár.
Nú á dögunum hætti stjórn knattspyrnudeildar, vinnan gekk illa. Sjálfboðaliðar eru hættir að vilja að starfa fyrir félagið. Nýir menn eru komnir til að stjórna og byrjuðu á að losa sig við Pedro Hipolito sem þjálfara. Leikmenn eru sagðir ósáttir enda hefur hann unnið við mjög erfiðar aðstæður. Til að mynda hefur ekki legið fyrir nema nokkrum klukkustundum fyrir leiki úti á landi, hvernig liðið mun ferðast í leikinn.
,,Við ætlum að fara dálítið í grunnhugmyndafræðina og byggja lið okkar á ungum og efnilegum Frömurum. Ætlum að byggja innan frá og til framtíðar. Hugsanlega að taka eitt skref til baka áður en við getum tekið tvö áfram. Að auki verður farið í að skoða að fá til liðs við okkur leikmenn sem falla að hugmyndafræði Fram. Við munum einnig endurskoða allan rekstur og umgjörð knattspyrnudeildar. Í framhaldi af þessu hefur verið samþykkt stefna og markmið meistaraflokks karla til næstu ára sem verður birt á heimasíðu félagsins á næstu dögum. Það eru okkar væntingar að Fram muni eiga sæti í úrvalsdeild áður en um langt líður og þangað stefnum við, en þurfum að komast þangað á réttum forsendum,“ segir í yfirlýsingu Fram í gær.
Félagið er í raun heimilislaust. Það átti að fara í Úlfarsárdal fyrir mörgum árum og þar átti heimili félagsins að vera. Flutningarnir hafa tafist og það hefur verið félaginu erfitt, félagið er með heimili út um allan bæ. Í Úlfarsárdal, Safamýri og svo á Laugardalsvelli þar sem liðið spilar fyrir nánast tómum velli. Slæm ástand félagsins skín best í gegn á heimaleikjum félagsins.
Mér finnst sorglegt hvernig komið er fyrir þessu sögufræga félagi og hvernig hægur dauðdagi knattspyrnudeildar hefur verið síðustu ár. Ég vona að félagið geti náð að rífa þetta sökkvandi skip á flot. Fram er stórveldi í sögunni og á að vera stórveldi í framtíðinni.
Ný stjórn sem tekur við fær erfitt verkefni, öflugir þjálfarar vilja eflaust ekki koma til Fram nema að mikið breytist. Mín von er að þetta sögufræga félag komist á rétta braut.
Hörður Snævar Jónsson
Ritstjóri 433.is
