Ólafur Jóhannesson, þjálfari Vals, var fúll í dag eftir 2-1 tap gegn FH í dag en Valur gat tryggt sér titilinn með sigri. Sigurmark FH kom í uppbótartíma eftir hornspyrnu.
,,Mér fannst við fínir í fyrri hálfleik en vorum daprir í seinni hálfleik. Að tapa leik svona er eins grátlegt og hægt er að hafa það í fótbolta,“ sagði Óli.
,,Eins og ég hef sagt áður þá er staða okkar þannig að við ráðum þessu sjálfir og það er frábær staða.“
,,Þetta var bara horn og klafs og sá sem er grimmari í boltann vinnur hann,“ sagði Óli um sigurmarkið.
Óli var svo spurður út í ummæli Rúnar Páls Sigmundssonar, þjálfara Stjörnunnar, sem talaði um að Óli hafi sagt að leikurinn gegn botnliði Keflavíkur í síðustu umferð væri gefins.
,,Ég hef aldrei talað um Keflavík við einn eða neinn. Það hafa margir talað um Keflavík og sérstaklega fréttamenn og núna eru þjálfarar farnir að blanda sér í þetta líka.“
,,Við berum virðingu fyrir öllum andstæðingum og nálgumst þá eins og alvöru andstæðing og við gerum það.“
,,Það getur allt gerst í fótbolta og við gerum okkur grein fyrir því. Við þurfum að eiga góðan leik á laugardaginn.“