Við greindum frá því fyrr í dag að Guðlaug Kristjánsdóttir, bæjarfulltrúi í Hafnarfjarðbæ hefði skrifað harðorðann pistil í garð bæjarstjórnar og FH.
Þar fór Guðlaug yfir víðan völl en samkvæmt FH-ingum fer hún með rangt mál að mjög miklu leyti.
Hafnarfjarðarbær hefur ákveðið að leggja til umtalsvert fjármagn svo að FH geti byggt knattspyrnuhús í fullri stærð.
Til að FH gæti fjármagnað verkefnið þá ákvað bærinn að kaupa íþróttahúsið, og tvö lítil knattspyrnuhús af félaginu.
Hlynur Sigurðsson, varaformaður FH og Valdimar Svavarsson, varaformaður knd FH hafa svarað henni í ítarlegum pistli.
,,Ítrekað hefur verið gefið í skyn að fjárhagsstaða FH sé slæm, illa sé farið með fé og félagið geti ekki tekið að sér framkvæmdina. Hið rétta er að eigið fé FH er um1100 milljónir, félagið er í skilum og hefur verið í skilum með sínar skuldbindingar. Allar framkvæmdir sem félagið hefur sinnt, eins og bygging eldri knatthúsa og flýtisamninga við bæinn hafa verið á áætlun og kláraðir,“ skrifa þeir félagar í grein sinni.
Greinin fer um víðan völl þar sem þeir félagar telja upp staðreyndir sem passa ekki við mál hennar.
,,Í viðtali á Bylgjunni fullyrti Guðlaug Kristjánsdóttir að FH hafi fengið 48 milljónir í mannvirkjastyrk frá KSÍ. Hið rétta er að FH hefur sótt um styrk að upphæð 15 milljónir króna sem er hámarksstyrkur frá KSÍ vegna einstaks verkefnis en ekki fengið krónu greidda þar sem ekkert hús hefur enn risið.“
,,Í grein á Kjarnanum fullyrðir Guðlaug að skuldir FH séu það miklar að félagið ráði ekki við þær og ætli að greiða þær niður með leigusamningi við bæinn. Hið rétta er að allar skuldir félagsins eru í skilum. Skuldir vegna byggingar Risans og Dvergsins hafa farið lækkandi á síðustu árum. Kaplakrikahópurinn er samstarfsvettvangur bæjarins og FH og mun hann koma með tillögu að rekstrar og/eða leigusamningi vegna knatthúsanna.“