KSÍ hefur staðfest það að leikur Völsungs og Hugins í 2.deild karla verði spilaður aftur og er leikur liðanna þann 17. ágúst gerður ógildur.
Huginn hafði betur er liðin áttust við þann 17. ágúst en Völsungur er nú fimm stigum frá Gróttu sem situr í öðru sæti deildarinnar þegar einn leikur er eftir.
Helgi Ólafsson, dómari í umræddum leik gerði sig sekan um slæm mistök er hann rak Freyþór Hrafn Harðarson af velli.
Helgi ruglaðist á leikmönnum en hann taldi að Freyþór hafði áður fengið gult spjald í leiknum en svo var ekki.
Aðstoðarmenn Helga reyndu að fá hann til að leiðrétta þessi mistök en hann hlustaði ekki.
Huginn vann þann leik 2-1 en Völsungur fær nú tækifæri á að komast í 40 stig og á möguleika á að komast upp um deild fyrir lokaumferðina. Liðið er fimm stigum frá efstu tveimur liðunum og á nú einn leik til góða.
Leikurinn fer fram á Seyðisfjarðarvelli en úrslitin skipta engu máli fyrir Huginn sem er fallið úr deildinni.