Bakvörðurinn Benjamin Mendy hefur átt ansi skrautlega 12 mánuði en hann spilar með liði Manchester City á Englandi.
Mendy er einnig partur af landsliði Frakklands og var í hóp er liðið vann heimsmeistaramótið í Rússlandi í sumar.
Mendy var að glíma við erfið meiðsli hjá City á síðustu leiktíð eftir að hafa komið frá Monaco.
Mendy hefur undanfarna 12 mánuði aðeins spilað átta leiki en þrátt fyrir það hefur hann unnið fjóra titla!
Mendy hefur unnið þrjá titla með City eftir komu hans þangað, ensku úrvalsdeildina, deildarbikarinn og Samfélagsskjöldinn sem City tryggði sér í gær eftir 2-0 sigur á Chelsea.
Mendy var þá eins og áður sagði partur af franska landsliðinu á HM en var þó í varahlutverki er liðið tryggði sér bikarinn í Rússlandi.