Íslenski landsliðsmaðurinn Albert Guðmundsson hefur skrifað undir samning við lið AZ Alkmaar í Hollandi.
Albert hefur verið orðaður við brottför frá PSV Eindhoven í sumar en hann fékk ekki mörg tækifæri á síðustu leiktíð.
Þessi 21 árs gamli leikmaður kom til PSV árið 2015 og skoraði 28 mörk í 63 leikjum fyrir varalið félagsins.
Albert færir sig nú yfir til AZ og vonast væntanlega til þess að fá mun fleiri tækifæri í aðalliðinu.
Albert skrifar undir samning til ársins 2022 og er talið að hann kosti félagið tvær milljónir evra.