Helgi Sigurðsson, þjálfari Fylkis, var gríðarlega ánægður með sína menn í kvöld eftir markalaust jafntefli gegn Íslandsmeisturum Vals.
Fylkismenn hafa fengið á sig mörg mörk undanfarið en liðið var mjög skipulagt í dag og varðist vel.
,,Við lögðum upp með það að verjast og vera þéttir til baka og sækja hratt er tækifærið myndi gefast. Við gerðum þetta upp á tíu í dag,“ sagði Helgi.
,,Þeir sköpuðu lítið sem ekkert í dag, þeir voru mikið með boltann á svæðum sem voru langt frá okkar marki og það var allt í lagi, við gáfum þau eftir.“
,,Við vildum vera þéttir til baka svo við værum með menn í tvöfaldri dekkningu alls staðar og að það væri stutt í hjálparvörnina og við gerðum það upp á tíu.“
Ólafur Ingi Skúlason spilaði með Fylki í fyrsta sinn í sumar og var Helgi ánægður með að fá hans reynslu inn.
,,Það er gríðarlega mikilvægt að fá svona reynslubolta inn, hann átti frábæran leik eins og aðrir í liðinu. Hann var kominn með krampa þegar tíu mínútur voru eftir en hann gaf ekkert eftir og hélt það út.“
Helgi og Ólafur Jóhannesson, þjálfari Vals, voru eitthvað pirraðir áður en flautað var til hálfleiks en Helgi segir að svona gerist í hita leiksins.
,,Þetta er bara svona í hita leiksins. Það eru engir eftirmálar af því frá mér, ég hef beðið hann afsökunar og það er ekkert mál.“
Nánar er rætt við Helga hér fyrir neðan.
