Stjarnan vann stórsigur í Pepsi-deild karla í kvöld er liðið heimsótti Víking Reykjavík í 14. umferð sumarsins.
Stjarnan komst yfir eftir aðeins 14 sekúndur í kvöld og bættu svo við þremur mörkum í öruggum 4-0 sigri.
Hér má sjá það góða og slæma úr leiknum.
Plús:
Ég held að Stjörnumenn hafi sjaldan skemmt sér jafn mikið í sumar og í kvöld. Spilamennska liðsins var einfaldlega æðisleg á tímum.
Hilmar Árni Halldórsson gerði tvö mörk fyrir Stjörnuna í kvöld. Hann er nú aðeins fjórum mörkum frá markametinu sem stendur í 19 mörkum.
Stjarnan tapaði gegn KR í síðustu umferð en sá leikur er úr sögunni. Liðið mætti gríðarlega grimmt til leiks og skoraði fyrsta markið eftir 14 sekúndur!
Stjarnan lyftir sér á toppinn með sigrinum í kvöld en liðið er með 28 stig eins og Valur sem er með verri markatölu. Valsmenn eiga þó leik til góða.
Eyjólfur Héðinsson skoraði eitt af mörkum sumarsins í kvöld. Átti frábært skot fyrir utan teig er hann kom Stjörnunni í 2-0, smellhitti knöttinn og átti Andreas Larsen aldrei séns.
Mínus:
Sölvi Geir Ottesen er meiddur og lék ekki með Víkingum í kvöld. Vörn liðsins var í algjöru bulli á tímum og er útlitið svart ef Sölvi verður lengi frá.
Það hjálpar Víkingum ekki neitt að missa af Kára Árnasyni sem er farinn til Tyrklands. Hefði gert mikið fyrir Víkinga sem eru nú sjö stigum frá fallsæti.
Víkingar gerðu í raun ekkert í kvöld. Spilamennskan var bara léleg og þá sérstaklega varnarleikurinn, heppnir að fá ekki á sig fleiri mörk.
Geoffrey Castillion er mættur aftur í Víkina en hann gerði ekki mikið í kvöld. Elti bolta í byrjun og vildi sanna sig en fékk lítið í hendurnar og kannski ekki við hann að sakast.
Hvernig færðu mark á þig eftir 14 sekúndur þegar þú byrjar með boltann? Alveg hreint út sagt ömurleg byrjun hjá Víkingum.
Það er ekki mikið hægt að setja út á leik Stjörnunnar. Haraldur Björnsson, markmaður, var þó nokkuð tæpur með sínar spyrnur í kvöld. Þrumaði boltanum oft á fyrsta mann eða nálægt fyrsta manni er hann ætlaði að negla honum langt upp völlinn.