Heimir Hallgrímsson er hættur með íslenska karlalandsliðið en hann staðfesti þær fregnir sjálfur í dag.
Heimir boðaði til fréttamannafundar í dag þar sem hann útskýrði ákvörðun sína. Hann hefur undanfarin sjö ár starfað með landsliðinu.
Heimir hóf blaðamannafundinn á því að fara yfir tíma sinn með landsliðinu og vill skilja við liðið eins vel og hægt er.
,,Það er óvanalegt að sá sem lætur af störfum haldi blaðamannafund en mig langar að skilja við þetta eins vel og hægt er,“ sagði Heimir.
,,Ég vil skilja í eins mikilli sátt og hægt er, þegar þú afkakkar að vinna fyrir einhvern, í þessu sinni er það KSÍ og íslenska þjóðin þá finnst mér að ég verði að koma þessu þannig frá mér að það sé sómi að.“
,,Ég hef alltaf átt frábært samstarf við þá sem hafa verið í kringum mig, hvort sem það séu fjölmiðlar, stuðningsmenn eða KSÍ. Ég vil skilja á þann hátt, eins og það hefur verið, í samvinnu við alla sem eru í kringum mig.“
,,Ég er virkilega stoltur og það eru forréttindi að fá að skila af sér stöðunni eins og hún er í dag.“