Króatía mun spila í úrslitum HM í Rússlandi á sunnudag er liðið mætir Frökkum í Moskvu.
Króatar slóu Englendinga úr leik á dögunum á Luzhniki vellinum en liðið vann 2-1 sigur eftir framlengingu.
Ivan Perisic átti frábæran leik fyrir Króata gegn þeim ensku og skoraði jöfnunarmark liðsins í venjulegum leiktíma.
Nú er talað um að Perisic verði ekki með Króatíu í úrslitaleiknum sjálfum vegna meiðsla í læri.
Perisic þurfti læknisaðstoð á sjúkrahúsi í Moskvu í dag og er alls ekki víst að hann geti spilað leikinn gegn Frökkum.
Þjálfari Króata, Zlatko Dalic, segir að það sé of snemmt að ræða um hvaða leikmenn séu klárir í slaginn um helgina og hverjir ekki.