Það er oft gaman að kíkja í gömul myndaalbúm og rifja upp gamla tíma. Meðfylgjandi mynd var tekin árið 2002 og sýnir þrjá fótboltakappa á mjög ólíkum aldri. Þeir áttu þó allir eftir að breyta íslenskri knattspyrnusögu í sameiningu.
Myndin var tekin í knattspyrnuskóla FH og til vinstri má sjá einn leiðbeinenda námskeiðsins, Emil Hallfreðsson. Emil lék sem kunnugt er með FH og var einn besti knattspyrnumaður landsins í sterkum 1984-árgangi. Fyrir framan Emil er svo bróðir hans, Hákon Hallfreðsson.
Á miðri myndinni má sjá Eið Smára Guðjohnsen sem síðar átti eftir að gera garðinn frægan með Barcelona. Hann gekk í raðir Chelsea árið 2000 og þegar myndin var tekin var Eiður einn af stjörnuleikmönnum liðsins í ensku úrvalsdeildinni. Tímabilið áður en myndin var tekin hafði Eiður skorað 23 mörk fyrir Chelsea.
Í rauðu treyjunni til hægri á myndinni er svo enginn annar en Gylfi Þór Sigurðsson sem þarna var ungur og efnilegur knattspyrnumaður í FH. Eiður kom sem gestur á námskeiðið, Emil var kennarinn og Gylfi nemandinn.
Ekki þarf að fjölyrða um það hversu mikilvægir þessir þrír leikmenn hafa verið í uppgangi landsliðsins á undanförnum árum. Þeir léku allir lykilhlutverk í að koma Íslandi á EM 2016 og spiluðu þeir þar saman. Gylfi Þór og Emil voru svo lykilmenn í íslenska liðinu á heimsmeistaramótinu í Rússlandi og voru óumdeilanlega tveir af okkar bestu leikmönnum á mótinu.