Ákvörðun Heimis Hallgrímssonar landsliðsþjálfara að dæma á Orkumótinu í Eyjum, tveimur dögum eftir að hann kom heim af heimsmeistaramótinu í Rússlandi, hefur vakið mikla athygli um allan heim.
Þráður um Heimi og viðveru hans á mótinu er einn sá allra vinsælasti í dag á Reddit, áttundu vinsælustu vefsíðu heims. Í þræðinum eru fjölmargir sem hrósa Heimi og benda á að landsliðsþjálfarar annarra þjóða myndu ekki láta sjá sig á slíku móti. Heimir er aftur á móti einstaklega jarðbundinn, mikill fjölskyldumaður og trúr sínum nánustu.
Yfir þúsund notendur hafa skrifað athugasemdir við myndina af Heimi á mótinu. Einn segir: „Hann virðist virkilega njóta sín“ׅ á meðan annar hvetur Ísland til að breytast aldrei.
Hér má lesa nokkrar athugasemdir:
„Ég velti því fyrir mér hvort svona myndi nokkurn tíma sjást hér í Bandaríkjunum.“
„Þetta er rétti íþróttaandinn“
„Þú veist að svona menn eru ekki í sportinu vegna peninganna eða frægðarinnar.“
„Af hverju er Ísland svona heilsteypt land?“
„Þessi maður…er ótrúlegur.“
„Þetta er náungi sem gefur sér ekki mikinn tíma til að hugsa: Hvað ef…“
Svo eru einhverjir sem velta fyrir sér veðurfarinu, eðlilega.
„Er í alvörunni svona kalt á Íslandi á þessum árstíma?“
Svarið við þeirri spurningu er já.