Zlatko Dalic, landsliðsþjálfari Króata, var ánægður með sína menn í kvöld eftir 2-1 sigur gegn Íslandi á HM.
Króatar unnu að lokum sigur gegn okkar mönnum en sigurmark liðsins kom undir lokin er Ísland sótti mörgum mönnum.
Dalic var sáttur í leikslok enda Króatar komnir í 16-liða úrslit. Hann hrósaði þó einnig íslenska liðinu.
,,Við gerðum það sem við vildum gera og fengum þrjú stig. Var það sanngjarnt? Svona er fótbolti. Ísland sýndi sem er mikilvægt í fótbolta; baráttu, aga og þeir gerðu það sem þeir reyndu að gera,“ sagði Dalic.
,,Ég get óskað þeim til hamingju með baráttuna og hugrekkið. Þetta er frábært lið sem spilar fótbolta á þann hátt sem hentar þeim. Það er erfitt að eiga við þá, föstu leikatriðun og löngu sendingarnar. Ég hrósa andstæðingnum en það sem skiptir máli er okkar frammistaða.“
,,Nú verðum við að hætta að hugsa um þessa þrjá leiki og gleyma þeim. Nú kemur augnablik sannleikans. Við eigum leik á sunnudag, við höfum spilað vel og notað nánast alla leikmennina sem áttu skilið að spila á HM.“
,,Við höfum unnið vinnuna okkar hingað til og í 16-liða verðum við að fókusa á Danina. Við tökum einn leik í einu og sjáum hvað gerist á sunnudag. Næsta verkefnið er alltaf mikilvægast.“