„Þá munu allir Íslendingar halda að við vinnum mótið, þeir eru svo vongóðir og bjartsýnir,“ sagði Heimir Hallgrímsson þegar hann var spurður á blaðamannafundi í morgun hvernig íslenska þjóðin bregst við ÞEGAR Ísland kemst í 8-liða úrslit heimsmeistaramótsins.

Um var að ræða erlendan blaðamann og virðist hann nokkuð viss um að dvöl íslenska liðsins í Rússlandi muni lengjast eitthvað. Heimir sló á létta strengi og sagði að Íslendingar væru í eðli sínu vongóðir.

Hann varð svo alvörugefnari þegar hann setti hlutina í samhengi og útskýrði fyrir blaðamanninum að vonir og væntingar væru mjög mismunandi milli þjóða.

„Það eru þjóðir sem eru að reyna að komast áfram, þjóðir eins og Argentína, Portúgal og Þýskaland. Það væri áfall fyrir þessar þjóðir að komast ekki áfram í 16-liða úrslit. En ef við færum í 16-liða úrslit þá væri það mesta afrek í stuttri fótboltasögu Íslands, það hefði mikla þýðingu fyrir okkur,“ sagði Heimir.

Aron Einar bætti svo við, eftir að Heimir hafði svarað spurningunni, að hann kynni vel að meta það hversu jákvæður og bjartsýnn blaðamaðurinn var.