Heimir Hallgrímsson segist hafa passað sig á því að hafa alltaf slökkt á farsímanum sínum meðan á heimsmeistaramótinu í Rússlandi stendur. Óvíst er hvað tekur við hjá Heimi eftir að mótinu lýkur og hefur Heimir sjálfur gefið til kynna að hann vilji skoða þá möguleika sem kunna að koma upp.

Kári Árnason hefur þegar verið orðaður við lið í Tyrklandi undanfarna daga en þegar Heimir var spurður að því hvort hann hafi fengið einhverjar fyrirspurnir frá erlendum liðum sagðist hann passa sig að hafa slökkt á símanum til að geta einbeitt sér að fullu að íslenska liðinu og þeim leikjum sem eru framundan.

„Spurðu bara staffið. Ég er alltaf með slökkt á símanum. Við erum með fulla einbeitingu á þessu verkefni,“ sagði Heimir og bætti við að hann hefði um margt að hugsa þessa dagana í tengslum við landsliðið.