David de Gea er að líkindum einn besti markvörður heims. Hann hefur sýnt það og sannað með spilamennsku sinni hjá Manchester United á undanförnum árum að fáir eru betri en hann þegar kemur að því að verja skot. Staðreyndin er þó sú að de Gea er eini markvörðurinn á HM sem enn hefur ekki varið skot á mótinu.
De Gea var í markinu þegar Portúgal og Spánn gerðu 3-3 jafntefli í einum skemmtilegasta leik mótsins til þessa. Cristiano Ronaldo skoraði öll mörk Portúgals í leiknum en svo vildi til að öll skot portúgalska liðsins fóru í markið. Spænska liðið vann svo Íran, 1-0, en í þeim leik átti íranska liðið ekki eina tilraun sem endaði á rammanum. De Gea hefur því spilað 180 mínútur á mótinu án þess að verja eitt skot.
Sá markvörður sem hefur varið flest skot í keppninni er Guillermo Ochoa, markvörður Mexíkó. Hann hefur varið 14 skot, eða 93,3 prósent þeirra skota sem hann hefur fengið á sig. Á eftir Ochoa er Kasper Schmeichel, markvörður Dana, sem hefur varið tíu skot. Okkar maður, Hannes Þór Halldórsson, er svo í hópi þeirra sem hafa varið níu skot ásamt Keylor Navas, markverði Real Madrid og Kosta Ríka, Ástralanum Matthew Ryan og Serbanum Vladimir Stojkovic.