Kári Árnason segist eiga erfitt með að sjá að Argentína fari heim af heimsmeistaramótinu í Rússlandi án þess að vinna leik. Argentínumenn eru með bakið upp við vegg fyrir lokaleikinn gegn Nígeríu í riðlinum og þeim dugir ekkert annað en sigur gegn Nígeríu á þriðjudag. Þá þurfa þeir að treysta á að Ísland vinni ekki Króatíu.
Kári var spurður út í leik Argentínu og Nígeríu á blaðamannafundi í Kabardinka í morgun og hvort liðið væri líklegra í þeim leik.
„Það er svolítið erfitt að segja. Þetta eru tvö mjög sterk sóknarlið. Argentína þarf að rétta úr kútnum og ég sé ekki að þeir fari heim af HM án þess að vinna einn leik. Ég vona að þeir geri það en ekki of stórt,“ sagði Kári en ef Argentína vinnur 1-0 og Ísland vinnur Króatíu erum við örugg með sæti í 16-liða úrslitum.
Kári benti þó á að Nígeríumenn hefðu sýnt það gegn Íslandi að þeir væru með mjög sterkt lið. „Nígeríumenn eru gríðarlega fljótir, sérstaklega frammi. Þetta getur verið hættulegt ef Messi og félagar eru að halda boltanum við þeirra teig. Þá eru þeir tilbúnir að refsa með skyndisóknum,“ sagði Kári.