Hörður Snævar Jónsson skrifar frá Rússlandi:
Gylfi Þór Sigurðsson, skærasta stjarna íslenska landsliðsins segir að sama hvernig fari á HM þá verði reynslan af mótinu góð.
Íslenska liðið gæti fallið úr leik á mótinu næsta þriðjudag, ef úrslitin gegn Króatíu verða ekki góð og ef úrslitin úr leik Nígeríu og Argentínu verða ekki hagstæð.
,,Við vitum að þeir hafa eitt besta landslið í heimi þessa sutndina, miðað við síðustu leiki,“ sagði Gylfi.
,,Ég held að það breyti ekki neinu að við fórum með sigur af hólmi fyrir ári eða töpuðum fyrir þremur árum. Þetta er nýr leikur en það er gott að við höfum sýnt það að við getum unnið þá.“
,,Það er erfitt að brjóta þá niður, þeir eru sterkir bæði varnarlega og sóknarlega. Við höfum ekki neinu að tapa, við þurfum góð úrslit og treysta á góð úrslit úr leik Argentínu og Nígeríu.“
Íslenska liðið þekkir það að koma sér úr erfiðri stöðu. ,,Þetta hefur gerst áður, síðasta dæmið er þegar við töpuðum gegn Finnlandi á útivelli. Við vorum í erfiðri stöðu en alltaf náum við að koma til baka og gera hið ómögulega. Ég vona að það gerist aftur núna.“
Gylfi segir að sama hvernig fari þá sé sú staðreynd að Ísland komst á lokamót HM eitthvað sem gefur mikið.
,,Það væri magnað að fara upp úr þessum riðli, að vera á HM er samt bara magnað fyrir yngri kynslóðir okkar. Þau geta horft á liðið sitt á þessu móti, ég get ekki ímyndað mér það því þetta var ekki svona þegar ég var ungur. Reynslan er alltaf jákvæð.“